Студенталöм — медся гажа оландыр! Специальносьт серти уджö пырöдчöм водзын тайö медводдза здукъяс, кодъяс йитчöмаöсь ыджыд öда-вына велöдчöмкöд, зачёт да экзаменъяс сдайталöмкöд. Öтпырйö студенталандыр тырöма томъяслöн гажлунöн, общественнöй олöмö пырöдчöмöн, каркöд тöдмасьöмöн да творчествоöн. Велöдчигöн, общежитиеын олiгöн том йöз вермöны восьтны да петкöдлыны ассьыс енбиалун, аслыспöлöслун, томъясöс öтувтны кужанлун.

Донысь Евгений Тимушев коймöд во нин велöдчö В.Т. Чисталёв нима культура колледжын йöзкоста художествоа творчество специальносьтлöн этнохудожественнöй творчество юкöнын. Медводдза восянь сiйö тöдмасис Любовь Четинакöд, кодкöд öнöдз на велöдчöны öти курсын да бура ёртасьöны. Любовь Четина олö Паджгаын. Мамыс — коми, миян районса Помöсдiнысь. Батьыс — коми-пермяк.

Женя да Люба ветлöны гöсьтитны и Паджгаö, волöны и Кулöмдiн районö. Донын Люба пасьтавлiс салдат форма да Победа лунлы сиöм концерт дырйи сьылiс кык песня. Выль вося гаж дырйи Лымнывö пасьтасьöмöн тшöтш петкöдчис выль вося сьыланöн. Любалöн гöлöсыс ёна мича. Выль во водзын жö социокультурнöй шöринын уджалысьяс коми кыв вылын дасьтiсны «Морозко» мойд. Сэнi жöникöн ворсiс Евгений Тимушев. Женялöн ичиньыс октябрын пасйис чужан лун. Сэки Женя да Люба вöчисны сылы бур козин, сьылiсны да йöктiсны гортас.

Женя – шань зон. Школаын велöдчигöн на пырöдчывлiс быдсикас гажö да уджö, социокультурнöй шöрин воссьöм бöрын сьылiс «Донса кыа» котыркöд. Петкöдчылiсны эз сöмын Донын, но и ветлiсны концертъясöн район пасьтала. Школаын велöдчöм эштöдöм бöрын шуис аслыс пырны велöдчыны культура колледжö, медым водзö сöвмöдны сьыланног да уджавны творческöй туйвизьын. Кытчöсюрö Евгенийöс корöны нин уджавны, но сылы колö на велöдчыны во да джын.

Люба – зэв тöлка ныв. Сiйö ичöтдырсянь мичаа сьылiс да петкöдчылiс Паджгаса культура керкалöн сцена вывсянь, а сiдзжö ветлiс этнопедагогическöй шöринö, кöнi сöвмöдiс ассьыс енбиалусö быдсикас творческöй нырвизьын.

Культура колледжын «Этнохудожественнöй творчество» специализация, кöнi велöдчöны Женя да Люба, уджалö 2011-öд восянь. Сэнi студентъясöс велöдöны пуктыны гöлöс, сьывны хорын, ворсны фортепиано да гудöкöн, пыдiсяньджык тöдмавны музыка йылысь.

Женя да Люба эз нин öтчыдысь петкöдчывны ыджыд концертъясын. 2015-öд воын Любовь Четина пырöдчылiс Сыктывдiн районса ансамблькöд «Василей» гажö. Сылöн эм ыджыд кöсйöм — велöдчöм бöрын локны уджавны Кулöмдiнö, районса культура керкаö. Та кындзи сылы ёна окота пуктыны «Василей» гаж. Евгений стöча оз на тöд, кытчö мунас уджавны велöдчöм бöрын, но кутам ыджыд лача, мый сылöн да Любалöн ставыс артмас.
Артур Гарнов.
Снимок гижысьлöн.