Тöв и гожöм

Гожöм — туй вöчысьяслöн пöсь кад, урчитöм кадöн вöчöны да дзоньталöны туйяс. Тöлыд оз жö шойччöд, ёна уджöдö. Колö ас кадö весавны лым, вильыдысь резйыны лыаöн. Туй овмöс матö став техника вылын сяммö уджавны Кулöмдiнысь Александр Витальевич Касев. 2017-öд воын вöр заптысьлöн пилорамасянь локтiс асшöр уджалысь Р.В.Третьяков дорö. Кык во стöрöжалiс. Роберт Васильевич вöзйис, а сэсся ыстiс велöдчыны карö машинист-трактористö.

Право босьтöмöн медводз пуксис каток вылö. Туй дзоньталiгöн бульдозер йöткалö лыасö, сы бöрся мунö да шыльöдö-топöдö каток. Сэсся сетiсны погрузчик, кольöм воын — грейдер. Туй вöчигöн да лöсьöдiгöн волiс районлöн уна сикт-посёлокö. Уджаланiнö техника нуöны асланыс тралöн. Роберт Васильевич водзвыв сёрнитчö юралысьяскöд да мукöд кывкутысь йöзкöд ассьыс уджалысьясöс оланiнöн могмöдöм да вердöм кузя.

Тöлын кык час войын Александр Витальевич грейдерöн туйын нин. Колö машинаяс петтöдз удитны весавны Кулöмдiнысь Сöветскöй улича, юрсикт шöрысь туйвеж, Аэропортö да Сосновкаö мунан туй, Стрöительяслысь кык улича, катыдын, а сэсся Ичöт Куж да Куж, Ульяна да Озъяг, кытi велöдчысьясöс новлöдлöны школаö автобусöн. А сэсся Кулöмдiнысь кытшола туй, тайö пытшкöсса делöяс министерстволöн районса юкöнлöн керкасянь катыдöдз.

— Грейдер бöрся мунö лыа резъян техника. Лыаыс бырас, да волам базаö, погрузчиклысь нырсö вежла кöш вылö, сöвта лыа, сэсся бара пысала ныр, да ёна лымъялiгöн, овлö, уджалам куим техникаöн. Овлö и, мый и турöбалiгöн луннас петалам нöшта на. Жугалас кö техника, асьным жö и дзоньталам, удж бöрся видзöдалам гöгöрбок, колö кö кыткö зэлöдыштам либö вежам, но мед ставыс дась нин вöлi аскиа лун кежлö. Кадöн ог артасьöй. Нимкодь, мый Роберт Васильевич тöждысьö уджалысьяс вöсна, велöдiс машинист-трактористö. Талун сиктад тайö зэв колана специальносьт. Öд туйястö пыр колö дзоньтавны да лöсьöдны, кутны бура. Сiдзкö, уджыс лоас пыр, — кыпыд ловкылöмöн сёрнитiс Александр Витальевич, кодлысь бура уджалöмсö пасйисны районса администрациясянь аттьöалан гижöдöн.
Марина Дадашова.
Снимок гижысьлöн.