Озыр и бур семьяясöн

[ A+ ] /[ A- ]

Воч сиктным мича, гажа и öтсöгласöн олысь гозъяясöн, кодъяс чужтiсны-быдтiсны челядьöс, уджалiсны уна во чöж. Öтув олiгöн венiсны-юкисны сьöкыдсö и радлунсö. И окота пасйыштны найöс.
Сергей Петрович да Галина Николаевна Булышевъяслöн июльын гижсьöмсянь лоас 46 во. Айлов Улыс Вочысь, а гöтырыс Помöсдiн вожысь. Сергей Петрович вель дыр веськöдлiс клубöн, уджалiс киномеханикöн, ёна снимайтiс сиктса олöм, йöзöс, мичаинъяс, и öнiöдз на снимайтö. Галина Николаевна лысьтысис госпромхозын, а сэсся совхозын да Ухтаса овмöслöн Вочса юкöнын. 1994-öд воын сiйö тупкысис, да колис уджтöг. Быдтiсны нёль челядьöс, ставныс лоисны бур йöзöн.

Иван Николаевич да Галина Андреевна Кочановъяс öтлаын матö 53 во нин. Верöсыс Улыс Вочысь. Ань Керчомъяысь, Коми пединститут помалöм бöрын ыстiсны велöдны роч кыв да литература Улыс Вочса школаö. Иван Николаевич медводз уджалiс связьын, сэсся 30 во школаын велöдiс труд да физкультура. Кык пи, öтиыс шопералö администрацияын, а мöдыс кусöдчысь.

Сентябрын Андрей Александрович да Антонина Андреевна Касевъяс кöлысь ворсöмсянь пасъясны 47 во. Семья кутысь Улыс Вочысь, гöтырыс Мöскашорысь. Кöзяин трактористалiс совхозын. Öнi аслас тракторöн отсасьö сиктсаяслы. Гöтырыс вузасис Вочса сельполöн лавкаын. Гозъялöн куим челядь.

Валентина Ивановна да Виталий Николаевич Кочанов гозъя Вылыс Вочысьöсь, 41 во сайын чужанiнаныс и поздысисны. Кыкнанныс зiлисны видз-му овмöсын. Айлов трактористалiс. И öнi на зiльö туй вöчысь котырын. Нёль пи да öти ныв. Иван пиныс пырöдчис торъя военнöй операцияö. Ныв-пиян вужъяссö лэдзисны Улыс Вочын жö.

Улыс Вочысь Сергей Павлович Морохинлысь сьöлöмсö вöрзьöдiс Воркутса медучилище помалöм бöрын воысь том медсестра Раиса Ивановна. 45 во олöны öта-мöднысö радейтöмöн да пыдди пуктöмöн. Та мында кадöн ань лоис дзик комиöн нин, сьылö «Катшасинъяс» котырын. Сергей Павлович трактористалiс госпромхозын, совхозын, водителялiс бурдöдчанiнын, талун кöть и шойччöг вылын, но пыр на уджалö школаын, автобусöн вайö-нуö Вылыс Вочса челядьöс. Ас олöмö петкöдiсны куим челядьöс.

Кольöм воын Василий Алексеевич да Антонина Петровна Морохинъяслöн öтув олöмын вöлi тшупöда пас, 45 во. Кыкнанныс уджавлiсны госпромхозын, совхозын. Василий Алексеевич Вылыс Вочысь, семьитчöмöн овмöдчисны Улыс Вочын. Ас олöмö петкöдiсны нёль пиöс.

Январ 19-öд лунö Юрий Андреевич да Надежда Петровна Морохинъяслöн гижсьöмсянь 46 во. Кыкнанныс Улыс Вочсаяс. Юрий Андреевич вöлi Вочса совхозын директорöн, гöтырыс сельпоын медшöр бухгалтерöн. Верöсыс петiс ас нянь вылö, гöтырыс сылы бухгалтералö. Нёль ныв. Öти ныв дiнаныс, мöдыс Вылыс Вочын, коймöд карын медсестра, медыджыдыс Москваын. Гозъя зiльöны водзö, кöть и пенсия вылынöсь. Кутöны лавка, отсасьöны гажъяс кежлö, козьналöны юмовторъяс. Öнi лöсьöдöны нянь пöжаланiн.

Иван Николаевич да Мария Алексеевна Морохинъяс Вылыс Вочысьöсь. Айлов госпромхозсянь вöлi кыйсьысьöн, оз и янсöдчыв гудöкыскöд, водзмöстчö гажъясын. Ворсö и аккордеонöн, Вылыс Вочса школаын — баянöн. Мария Алексеевна уджалiс сельпоын вузасьысьöн. Öтув олöмыслы 41 во.

Иван Анатольевич да Надежда Ивановна Морохинъяс Улыс Вочысьöсь. Иван Анатольевич трактористалiс совхозын, Надежда Ивановна уджалiс почталöн юкöнын, разöдiс газет-журналъяс, весиг и пенсия вылö петöм бöрын на. Öнi вузасьö асшöр уджалысь Юрий Андреевич Морохинлöн лавкаын. Кык ныв. Ольга мунiс мамыслöн кок туйöд, уджалö Кулöмдiнса почтампын. Юляыс карын садйын воспитатель.

Александр Гельевич Расов волiс Озъягысь. Улыс Вочын и аддзис ассьыс шудсö, Маргарита Леонидовнаöс. Айлов бригадиралiс совхозын му вöдитысьяслöн котырын, ань пöжасис сельполöн нянь пöжаланiнын. Чужтiсны да быдтiсны вит челядьöс.
Бöркыв вылö пасъя, став гозъяыс кыпöдiсны зумыд керкаяс, став мужичöйыс кыйсьöны-вöралöны, олiсны скöтöн, кодсюрöыс и öнi на видзöны. Пыр на олöны öта-мöднысö пыдди пуктöмöн да радейтöмöн, ставнысö тöждöн кытшалöны челядьныс. Сиам налы сöвет да любов, овны водзö лöсялöмöн да муслунöн.
Валентина Ширяева.
Снимокъяс Людмила Ульдрикаслöн. 

Комментарии:

Добавить комментарий

Свежий выпуск: 18 апреля

Осторожно — мошенники!