Домна Михайловна Мартюшева зэв бура тöдö да радейтö важ коми йöзкостса сьыланкывъяс, оз весиг торксьыв, ливкйöдлас помöдзыс. Мыла сьыланъяс босьталiс и аслас тшупöда паса лунö, кор Дiасёръяö сiйöс ыдждöдлыны волiсны да Россияса президент В.В.Путинсянь сетiсны чолöмалан гижöд районса администрацияöн веськöдлысь Сергей Владимирович Рубан, овмöдчöминса юралысь Мария Вениаминовна Опарина, олöмаяслöн посёлокса котырöн юрнуöдысь Нина Егоровна Шатохина. 
Шань, пыр на восьса сьöлöма ань. Оз элясь, оз лябсьы, кöть эськö вуджис уна сьöкыд. Чужис 1931-öд вося январ 7-öд лунö Донын. Михаил Дадукович да Анастасия Степановна бать-мамыслöн вöлi вит челядь. Сизим арöсын нывкаöс велöдiсны нин ытшкыны, колхозын бергöдiс и вермана удж. Сизим класс и помалiс. 1949-öд воын Уллянаын велöдчис тшöтайтчысьö да 1950-1951-öд воясын Донын «Вермасьöм» колхозын зiлис босьтöм специальносьт серти. 
А сэсся нывъёртыскöд мунiсны Помöсдiнö. Домна Михайловнаöс леспромхозö босьтiсны кассир-тшöтайтчысьöн, 1952-öд воын ыстылiсны велöдчыны Сыктывкарö. Мöд вонас Сьöдтыдiнö вöр лэдзысьяс дорö индiсны старшöй тшöтайтчысьöн. Сэнi и аддзис ассьыс шудсö, тöдмасис аскиа верöсыскöд, Вомынъюрысь воöм Владимир Порфирьевич Мартюшевкöд. 1956-öд воын вуджисны Дiасёръяö, Вöльскöй лесопунктын том нылöс пуктiсны медшöр бухгалтерöн, да тайö кывкутана удж вылас вöлi 1981-öд воöдз. Пенсия вылас петiс 1987-öд воын. Дыр да уна во бур уджысь пасйылiсны юбилейнöй медальясöн, почёт грамотаясöн да аттьöалан гижöдъясöн. 
Верöсыскöд быдтiсны да ас олöмö петкöдiсны квайт челядьöс. Уна челяльöс чужтöмысь донъялiсны медальöн. Татьяна нылыс олö Перым крайын, Владимир да Светлана — Сыктывкарын, Валентина да Александр Дiасёръяынöсь. Öти пи абу нин ловъя. Талун олöма аньлöн озырлуныс – 6 внучка да 3 правнук да 2 правнучка. Домна Михайловна олö Александр пиыскöд. Радейтö лыддьыны газетъяс. Тшöкыда волöны внук-внучкаяснас челядьыс, бытьысь налы висьталас петасъясысь тöдмалöм республикалöн да районлöн талунъя серпасöн. Оз коль олöмсьыс. 
Елена Курочкина. 
Снимок районса администрациялöн.