Нинöм оз падмöд

2015-öд восянь Донын уджалö выль ломтысянiн, кодi шоныдöн могмöдö сиктса сад, школа да социокультурнöй шöрин. Пытшкас сулалö брикетъясöн ломтан кык ыджыд пач. Ломтысянiн пырö культура юкöнын бюджетса учреждениеясöс могмöдан шöринö, кодöн веськöдлö Анна Александровна Попова. Сiйö висьталiс, мый брикетъясöн ломтысянiн ёна бур. Орччöдны кö бисянь шонтысянкöд, нöшта на и ёна донтöмджык. Вонас мунö матö 170 тонна брикет. Вайöмасö видзöм могысь орччöн эм торъя склад. Бöръя кык тöвсö брикетъяс ваялö Югыдъягысь асшöр уджалысь В.В.Белый. 2019-öд воын могмöдiс асшöр уджалысь В.А.Панюков, кодлöн Тимшерын эм вöр колясысь ломтас вöчанiн. Донса ломтысянiнын уджалö нёль морт.
Тавося тöв вöлi кöдзыдсьыс кöдзыдöн да лэчыдöн. Став оборудованиеыс уджалiс бура, нинöм эз торксьы, некод эз элясь. Став объектсö могмöдiсны шоныдöн колананог. Уджалысьяс ставсö пасъялöны. Быд час гижалöны температура, уна-ö брикет мунö пач ломтöм вылö. Овлö кö, мый Донын кусöдлöны би, ломтысянiнын эм дизель-генератор. Уджалысьяслы танi лöсьöдöма став условиесö: эм шойччан жыр, кöнi позьö сёйыштны, видзöдны телевизор, эм и душ, шоныд туалет да ки-чужöм мыськанiн. Быд ломтысян сезон помын да восьтöм водзын пожъялöны шоныд мунан трубаяс, лöсьöдчöны локтан тöв кежлö.
Василий Владимирович Карманов зiльö ломтысянiн восьтöмсяньыс. Сылöн кывъяс серти брикетъясöн ломтысьöм бур экология боксянь. Öти-кö, наысь оз пет лёк тшын, мöд-кö, вöр колясъяс мунöны делö вылö. Ачыс Василий Югыдъягысь. Гöтрасис Донса ань вылö да татчö и вужъясис, гозъя быдтöны куим челядьöс. Уджыс гортсяньыс зэв матын. Василий петкöдлic асьсö кывкутана мортöн, да бура уджалöмысь кольöм воын сылы сетiсны ошкана гижöд.
Гижöд да снимок Артур Гарновлöн.