Пыр дасьöсь

• Компьютер отсöгöн уджалöны ломтысянiнъяс, ва сетанiн,весаланiнъяс, да училищеын велöдöмысь этша нин мый лöсялö öнiя уджлы. Асьным корсям интернетысь, быд куим во мысти велöдчам карын. Сэнi жö быд во экзаменöн донъялöны сям да тöдöмлун. Уджалан котырын витöнöсь, ставныс ыджыд сямаöсь. Лун и вой дасьöсь бырöдны-лöсьöдны жугалöм-орöминъяс, быд праздник дырйи кодкö да дежуритö, мед ставыс уджалiс лючки-бура, мед йöзлы пыр воис ва да шоныд, — сёрнитiс «Шоныд сетан Коми компаниялöн» Кулöмдiнса юкöнысь би оборудование вöсна кывкутысь котырлöн мастер Иван Николаевич Липин, кодi кызь во нин тайö удж вылын.
  Кулöмдiнса зон армияöдз на локтöма шöр ломтысянiнö. 18 арöс тырис, да индiсны операторöн. Служитöм бöрын Выльгортса училищеын велöдчис электрикö да водительö. Кулöмдiнö волiс практика вылö. Петкöдлiс ассьыс сюсьлунсö, сьöкыдысь повтöмлунсö, да сiйöс виччысисны нин велöдчöм бöрын. Туйдысьнас вöлi ыджыд сяма уджалысь Иван Васильевич Тимушев. Котырын кык том электрик и вöлi, да кыдзи ачыс висьталö, быдлаö котрöдлöмысь öдйö велалöмась быдторйö. Уджыс вöлi юрвыв тыр. Сэки найö кывкутöмаöсь и уличаяс вылын да керкаясын биысь-югзьöдöмысь, ветлiсны район пасьта.
  2006-öд восянь Иван Николаевичöс индiсны мастерöн. Буретш сылöн веськöдлöмöн и вуджисны компьютер отсöгöн уджö. «Сöстöм ва» программа серти ва весалан сувтöдiсны Лöгинъягын, Ручын, Дереваннöйын, Донын. Вайисны и Паспомö. Сувтöдасны-йитасны, а лöсьöднысö воласны Челябинскысь специалистъяс да велöдасны миянлысь электрикъясöс.
  Эм асланыс 2013-öд воын кыпöдлöм вöчасянiн-юрсюянiн. Пытшкöсса уджъяссö вöчисны асьныс нин.
  Иван Николаевич во гöгöр чöж район кытшлалiгöн пасъялö кöнi мый колö дзоньтавны либö вежны, водзвыв лöсьöдчö-дасьтысьö локтан тöв кежлö. Гожöмын ас вынъясöн и вöчасьöны. Серам сорöн казьтывлiс быдсяма лоöмторъяс йылысь, кыдзи öтчыд Улыс Вочысь локтiгöн эз и тöдлыны машинаыслысь кöлеса усьöмсö, кыдзи гын сапöгöн пырисны шорö перйыны сiйöс, юрсиктлöн катыдса постанцияö мунiгöн куим лун дорвыв Педот чойтi лэччигöн вильснитлiсны да потлiсны лампочкаясыс, кыдзи унаысь подöн бергöдчылiсны Донысь, Озъягысь.
  Гижöд да снимок Марина Дадашовалöн.