Пывсян — мый пö сэтшöмыс и эм. Йöр пельöсö ёкмыльтчöм ичöтик стрöйба. Но сыкöд комияслöн йитчöма дзоньнас олöмыс. Та йылысь весиг висьталöны öнiя кадöдз воöм важся гижöдъяс. Со мый гижсьö 1848-öд вося 49-öд номера «Вологодские губернские ведомости» газетын. «Зыряна оз вермы овны пывсянтöг, налöн сiйö ломтысьö дзик быд лун. Сэнi найö пелькöдöны асьнысö, мынтöдчöны дзик быд висьöмсьыс, ставпöлöс нёрпалöмсьыс, мудзысь, нывбабаяс сэнi весиг вайöны кага. Мужикулов, кор мунöны ылi парма-ягö вöравны или нажöткала кытчöкö бокö — медводз лэптöны сэнi пывсян. (Тадзи жö важöн шусьывлiсны и вöралан керкаяс.) А сытöг дзик некыдз, кор звер-пöтка бöрся ковмывлiс вöтлысьны лым усьöмсянь декабр квайтöд лунöдз, а сэсся шойччыштöм бöрын январсянь март кызь витöд лунöдз.»
Коми грездъясö воöм роч йöзлы и суйöрсайсалы вöлi зэв тешкодь и дикöвинка кывны, кор рытгорув кодкö гораа да душ-мöдысь чуксавлiс: «Пывсян!» И тайö шы вылас оланiн пасьтасьыс кöмтöм кока мужикулов (тöв кöть гожöм, зэр кöть шляча кöдзыд) öтпöвсöн öти кузь дöрöм кежысь киняулас топöдöм корöсьöн мöдöдчывлiсны горöданiнö. Кык-куим метра кузьта да пасьта нёль пельöса жарöн ыпъялысь стрöйба дорö чукöрмывлiс дасысь унджык мужичöй. Паськöм шыбитлiсны веськыда ывлаас, пыранiнас, а тöвнас куш кокöн юждыштöм лым вылас да юркнитлiсны пытшкас. Судтанас абу джуджыд, кузьджык тушааяслы ковмывлiс копыртлыны юръяссö. Тайö вöлi трубатöм сьöд пывсян, став пес ломтан тшыныс петавлiс öдзöсöдыс да та могысь йирк бердас вöчöм ичöтик розьöд. Та вöсна саыс стенъясын öшавлiс шмакöн. Шоныд ва некорсö эз вöвлы, сöмын пу ведраын кöдзыд ва, горйö койышталöм вылö. Пач пытшкын омралö на би öгыръяс весьтын лöз чад, а пач бокас тувйыштöм пöв вылын пукалöны нин пывсьысьяс да и вылынджык, пöлатькодь йирк бердас тырмымöн жö — медся öжигайтчöмыс. Корöсь швачкöм улын сöмын корсюрö кывлö кодлöнкö горöдöм: «Ва кисьт!» Выльпöв доналöм изъяс вылö койыштöмысь жарыс кыпалö 70 — 80 градусöдз. Вирыд тöкöтьö оз пузьы, весиг корöсьсö кутны оз вермыны — шыблалöны киысь-киö. Медся олöмаясыс дзик пач дорас. Найöс пывсьысьяс, позьö шуны, кык ки костын петкöдöны ывлаас, сы вöсна мый таджъялöны да оз кöсйыны петны, буракö, некыдз оз пöтны жарсьыс. Минут 8-12 мысти ставныс гузьгысьöны ывлаö да водöмöн ниртчöны лым вылас — öд унджыкыслöн сасьыс чужöм ни рожа. Гожöмнас бузгысьлöны орчча юас. Сэсся пасьталöны сiйö жö дöрöмсö да тэрмасьтöг руньгöны гортланьыс. На бöрся пывсянö, кöнi уна са, лэччöны нывбабаяс йылöмныскöд. Дерт, татшöм жарад асьтö песöм да нöшта на са пиад пуртiкасьöм бöрын став кöвъясьöм висьöмыд чужигас на виньгыртö.
Öнi сьöд пывсянтö гежöда паныдавлан, ставныслöн трубаа да пытшкöсыс горнича кодь лов кыпöдана. Но ассьыс бурдöдан вынсö эз вошты. Мудзöмысь, кынмöмысь, лысьöм юкалöмысь, нёрпалöмысь — медбур лекарствоыс. Койыштлан доналöм гор вылад корöсь ватö — вирыд пузьывлö жарсьыс. Став лысьöмыд небзьö. Лигышмунлас гöгöр. Небыд чуньпомъяса жарыс чепöльтö быдлатi гусьöникöн. Швачнитан мыштö пушкыртчöм купальничаа пöсь корöсьöн — ойкнитлан и окнитлан. Кымын ёнджыка швачöдчан, сымын окота быттьö водзö шенасьны. Добра-а-а! А коронавирусыд, шуöны, пагалö нин 25 градус шоныдын. Ёртъяс, тайö сьöкыд кадас эн вунöдöй пöльяслысь медбур бурдöдчанногсö.
Владимир Шомысов. Снимок гижысьлöн.