Петiс ас нянь вылö

Кулöмдiнысь Георгий Александрович Китаевöс юрсиктын тöдöны кыдз бур механизаторöс, öд «кöрт вöлыскöд» сiйö ёртасьö школа помалöм бöрсянь нин. Велöдчис Кебанъёльса 26-öд номера училищеын трактористö. Армияöдзыс уджыштiс «Усть-Куломскöй» совхозлöн шöр отделениеын. Тшöтш и армия бöрас на. Сёрöнджык — Кулöмдiнса МТС-ын. Пыр трактористöн. И со матö 15 во нин зiльö Кулöмдiнса сортоучастокын. Водз тулыссянь сёр арöдз муяс вылын пыр мургö-кылö сылöн тракторыс: гöрö, пуктысьö, кöдзö, ытшкö, идралö пуктас.
Бöръя воясын пыр тшöкыдджыка кутiс мöвпавны ас нянь вылö петöм йылысь. Да и олöмыс тадзи кутiс тшöктыны. А мый — сьöкыдысь оз пов, сиктса мортыд таö велалiс ичöтсяньыс нин. Да и гортас пыр олiсны скöтöн. Öнi на гöтырыскöд видзöны-быдтöны вит сюрукöс: куимыс лысьтан, кыкыс ялавич. Семьятö, куим челядьтö колö мыйöнкö вердны. Со и шуис босьтчыны фермеравны. Öнiя кадö пö сöмын ас вылад лачаыс. Пасйысис да матö во нин кыдз крестьянин овмöс кутысь.
— Видз-му овмöс юкöнöн веськöдлысь Анастасия Ревокатовна Ярова грант шедöдöм могысь вöзйис пырöдчыны видз-му овмöс министерствоöн котыртöм балаяслöн конкурсö. Отсалiс лöсьöдны баласö. Донъялiсны да 30 гырысь скöт юрлы карта лэптöм вылö сетiсны кöкъямыс миллион шайт грант. Нöшта мöвпала босьтны кызь лысьтан мöс да дас ялавич да кукань. Картасö шуи кыпöдны Носимын, Кулöмдiн гöгöрын колана иныс эз сюр да.
Тулыс пуксьöмкöд крестьянин овмöс кутысьлöн уджыс тыр. Öнi босьтчис скöт карталы нюжöдны ва. А коркö май помын ли июнь пансигöн ковмас нин босьтчны кыпöдны гидсö. Тайö сы сайын, кор на вермасны локны Мысысь грант тшöтш шедöдысь фермерлы скöт карта лэптысь «Агрострой» котырса уджалысьяс. Сэнi эштöдасны да матыстчасны татчö. Ставыс кö артмас лючки, джöмдавтöг, Носимын мöс гид кыпалас тöлысьöн-джынйöн, а арнас овмöдасны нин татчö сюрукъясöс. Картаыс лоас ангар сяма. Татчö локтас ва, лоас шоныд, пуктасны öнiя сикас став колана оборудование. Сiдзкö, мöс-куканьяслы позяс нин лючки-бура тöвйыны танi. Да и тыр пöтöн, гожöмнас Георгий Александрович шуис заптыны турун ылöсалöмöн 15 юрлы, артмас кö и унджыклы на. Носимын, майбыр, виддзыс тырмымöн, скöт картасянь матын. Пуктысьны отсаласны, дерт жö, сылöн матыссаясыс, челядьыс. Медыджыд пиыс уджалö нин, шопералö, и, кöнкö, лоас батьыслöн веськыд киöн, медшöр отсасьысьöн. А сэсся эм на и аслас кутшöмсюрö техника – трактор да прицеп. Пуктысьны, кыдз шуис сiйö, кутас асшöр уджалысь Василий Иванович Чалановкöд öтув. Водзö вылö сюрукъяслысь йöвсö кöсйö инавны «Усть-Куломскöй МТС» кооперативö, кытчö пырис и ачыс.
Юрсиктсянь Носимöдз öтарö-мöдарö ветлыны абу ёна кивыв, сы вöсна Георгий Александрович шуис скöт карта дорö матö кыпöдны и оланiн. А сэсся ставыс ладмас да артмас, тыр-бура лöсьöдас-паськöдас овмöссö, содтысяс уджалысьясöн. Но тайö ставыс на водзын.
Галина Нестерова.
Снимок вылын: Г.А.Китаев (веськыдвылас) В.И.Чалановкöд.