— Школаын велöдчигöн весиг эг на тöд ни эг думайт, водзö вылö
кутшöм профессия бöрйыны. Кöкъямысöд классын юасисны миянлысь, кодi кытчö кöсйö мунны велöдчыны, кутшöм специальносьт шедöдны. Ме нинöм мöвпышттöг шуи, мый лоа бурдöдысьöн, — казьтывлiс школадырся кадсö Кулöмдiнысь Юлия Владимировна Самарина.

 Гашкö, сiйöн, мый сiйö мукöд сертиыс сылы матынджык, да и биология урок вöлi медся радейтана да кокниа сетчис. Кöть быд предмет кузя велöдчис зэв бура, школасö помалiс весиг зарни медальöн. Пырис велöдчыны Сыктывкарса госуниверситетö бурдöдысьлöн факультетö. Лунысь лун, тöлысьысь тöлысьö, воысь воö босьтiс выльысь выль тöдöмлунъяс. Сiдзи квайт во лэбис зэв öдйö. Лоис врач-терапевтöн. Велöдчигмозыс карса бурдöдчанiнъясын прöйдитiс практика. Дерт,
эз ло тырвыйö, сы вöсна мый падмöдiс ковид кузя пандемия,
сэки висьысьяс дорö ёна ветлöдлыны эз позь. Бергöдчис ас сиктö, Кулöмдiнö. Сiйö и гöгöрвоана, öд танi сiйöс виччысис радейтана верöсыс, кодкöд öтгöрöдö йитчисны мöдöд курсын велöдчигöн нин.
Да и уджыс танi вичмис. Мый-мый, а бурдöдысьясыд миян танi пыр колöны…
Водзö лыддьöй октябр 19-öд лунся газетысь.
Галина Нестерова.

Снимок гижысьлöн.