Спортса мастерö кандидат Максим Андреевич Игнатов челядьдырсянь ёртасьö спорткöд.

– А ышöдiс чойöй. Сы вылö видзöдöмöн коймöд классянь и сувтi лыжи вылö. Спорт школалöн Помöсдiнса юкöнысь тренеръяс Николай Николаевич Карманов, Николай Павлович Игнатов да Илья Николаевич Игнатов отсöгöн пыр ёнджык кутi ёртасьны спорткöд, – висьталiс Максим Андреевич.

Школа бöрын веськалiс биатлонысь республикаса ордйысьöмъяс вылö да лоис вермысьяс лыдын. Босьтлiсны лыжиöн котралысьяс да биатлонистъяслöн республикаса öтувъя котыръясö. Петкöдчылiс и Россия тшупöдын Рытыв-Войвыв кытшын. Школаын велöдчигöн на босьтчис ворсны пызанвывса теннисöн да республикаын пыр вöлi вермысьяс лыдын, лыжиöн котралöмын да теннисöн ворсöмын унаысь шедöдлiс медводдза места. Тшöкыда пырöдчылiс и «Зумыд ош», «Туган» да «Йиркап» районса ордйысьöмъясö.

– Быд во петкöдча сиктса спорт фестивальын, кодi мунö юрсиктын. Спортысь эг эновтчы, водзö кутчыся дзоньвидза оласногö. Республикаса öтувъя котырö пырöмыс велöдiс уджавны йöзкöд, – пасйис том морт.

Максим Андреевич помалiс республикаса видз-му овмöс техникум, а сы бöрын уджысь орöдчывтöг – Москваын содтöд тöдöмлун сетан да уджсикасö велöдан национальнöй туялан институт.

Армия бöрын бергöдчис чужанiнас да пырис уджавны спорт школаö тренерöн, сэсся вуджис школаö гырысь классъясын физкультура велöдысьöн. Сылöн быдтасъясыс тшöкыда петкöдчöны республикаса да районса ордйысьöмъясын, петöны вермысьяс лыдö.
Татьяна Чувьюрова.
Снимокъяс Максим Игнатовлöн.