Мортыд кö висьталö, кытi сылöн висьöдоймö, а пемöсыд оз. Сылысь нёрпалöмöсö колö кывны, гöгöрвоны, аддзыны синъяс, öбича, весиг гöн сертиыс. И тайöс вермас вöчны сöмын велöдчöм, нёль кокаясöс радейтысь, накöд ёртасьысь морт. Районын бура тöдöны кывкутысь фельдшер Андрей Михайлович Сурнинöс. Дорйис-бурдöдiс уна сюрукöс, понйöс, каньöс да мукöд пемöсöс. Школаын велöдчигöн на бöрйис тайö туйвизьсö. Öкмыс класс помалöм бöрын пырис видз-му овмöс техникумö.
— Нёль во велöдчöм колис öти во моз. Дерт, медводдза кадас гажтöмтчи бать-мамысь, чужанiнысь. Но зэв öдйö сöльнитчи республика пасьтаысь воöм велöдчысьяслöн котырö, — висьталiс Андрей Михайлович. Сетiсны тöдöмлун, сэки жö велöдiсны аддзыны-казявны висьöмсö, сетны пемöсъяслы колана отсöг.
Öнi Андрей Михайлович уджалö Кулöмдiнса ветстанцияын. Олöмыс шыбитлiс весиг карöдз, зiлис республикаса пемöсъясöс бурдöданiнын. Но сьöлöмыд кыскис тай век жö аслас чужанiнö.
Ветеринарлöн удж абу кокни, позьö шуны зэв öпаснöй.
— Гогнитас коньöыд сюрнас, либö чужъяс чибöыд, а понъясыд кымынысь курччавлiсны, лыддьöдлыныс весиг он куж. Но колö кужны лöньöдны. Кыдзи и мортыдлы, лöсялöны бур кывъясыд, шыльöдöмыд. Уколтö вöчигöн гырысь пемöсъясöс кутан ныр розьöдныс, сэнi налöн дойманаиныс, сэки бурджыка кывзысьöны кöзяйкаыслысь. Бур, кор асланыс пемöсъяс вöсна ыджыд тöждаöсь и овмöс кутысьяс, — весиг сёрниас тыдалö, кутшöма радейтö ассьыс уджсö Андрей Михайлович.
Овлö быдсямаыс. Шуам куканьöс вердiсны веж турунöн, а тадзи оз позь вöчны, либö понйöс лэдзлiсны котравны ас кежсьыс ывлаö, да код тöдас мый сёйис. Видзöдан пемöс вылö, а синмыс жугыль, öдва сулалö кок вылас, кöть эськö сёян дозйыс тыр.
Водзтi вöлi тöв кöть гожöм, кöдзыд кöть зэр, лун кöть вой быть мунны висьмöм пемöс дорö. Бурдöдан, а сiйö тэнö аттьöалас – нюлыштас бан бокад, бакöстас, пон небыдика увтыштас, кань синмад видзöдöмöн нявöстас да с.в.
Сиктад вель ёна чинiс гырысь скöт юр лыдыс. Но зэв унаöн видзöны шоныд муысь вайöм ёжикъясöс, хомякъясöс да мукöд пемöсöс. Лöсьöдöны бур да дона каньясöс, понъясöс, весиг лэбачьясöс. Öнi пемöсъяс лоисны гортса олысьясöн нин. Вайöны бурдöдчанiнö ассьыныс радейтанаторъяссö. И мед колананогöн отсавны, колö пыр велöдчыны водзö. Таво Андрей Михайлович пырис Вöлöгдаса йöв овмöс академияö, мед сöвмыны-быдмыны удж кузя.
Татьяна Чувьюрова.
Снимок Андрей Сурнинлöн чукöртöмысь.