Иван Валерианович Карманов Чернобыльö ветлiс эз öтчыд, а куимысь. Кор лоис ыджыд неминуча, пасьмунiс атома электростанцияысь реактор, сiйö уджалiс сынöдсянь вöр видзан да кусöдан юкöнын, да сэсянь и ыстiсны командировкаö.
Овмöдiсны Чернобыльсянь 30 километра сайын. Матынджык овны эз шогмы, вöлi öтдортöм, овны позьтöм зона. Вöр сотчöминъясö лэблiсны вертолётöн, му вылöдз лэччылiсны канат кузя.

— Кусöдлiм торф пластъяс, пöдтылiм вöрысь би. Быдöнлöн сьöрсьыс вöлi карандаш кодь дозиметр. Сэтысь лыдпассö пасъявлiсны торъя журналö. Сотчигöн радиациялöн выныс кык пöв содлiс, та вöсна позис быд лун уджавны сöмын кык час, а сэсся вежсьылiм мöд котыркöд. Медводдзаысьсö командируйтлiсны тöлысь кежлö, — бергöдчылiс важас Иван Валерианович.
1987-öд воын Чернобыльö айловöс 30 лун кежлö нуисны мöдысь,
1988-öдын командировкаыс вöлiс нин 40 лун.

Чужис айлов Выльгортын 1965-öд воын ыджыд семьяын. Армияö босьтiсны 1983-öдын, веськалiс сынöдса десант войскаö. Мойвиис водзсасьны душманъяскöд Афганистанын. 1985-öд воын, арнас, бергöдчис гортас. Гöтрасис, чужис ныв.

Иван Валерианович уджалiс Помöсдiнса леспромхозын, ломтысянiнын, йöлысь вöлöга вöчанiнын, вузасянiнын.
Кад кольöм мысти айлов гöтрасис мöдысь. Елена Алексеевналöн вöлi нин кык пи, нöшта чужтiсны кыкöс. Иван Валериановичлöн талун öти ныв да нёль пи. Кык пи пырöдчисны торъя военнöй операцияö. 2023-öд воын оборона министерствокöд кырымалöм контракт серти Украинаö ветлiс и ачыс, но дзоньвидзалун вöсна во мысти комиссуйтiсны. Öнi шойччöг вылын. Елена Алексеевна гöтырыскöд вöдитöны град выв пуктасъяс, вотчöны да кыйöны чери. Нимкодясьöны öкмыс внук-внучкаöн.
Татьяна Чувьюрова.
Снимок Иван Кармановлöн.