Война вайис шог матö быд керкаö, быд семьяö. Кадысь водз верстяммисны батьтöг кольöм челядь. Татшöм жö олан туй вуджис Нина Васильевна Щелчкова. Чужис Яков грездын 1934-ö вося декабр 28-öд лунö. Василий Александрович Лодыгин батьыс уджавлiс лесхозын. 1941-öд вося август кöкъямысöд лунö удж кузяыс лэччис Кулöмдiнö да гортас сэсся эз и волы. Сэнi и босьтiсны война вылö. Мамыслöн сойборд улö колисны квайт чоя-вока, Нина вöлi коймöдöн. Ёна отсасисны бергöдны овмöс, öд карта тыр скöт, мамыс нöшта кыйсис на. Батьсяньыс волiс письмö, корлiс фронт вылö носки-кепысь. Ыжъястö видзлiсны, да вурун вöлi. Кыисны да ыстiсны. Батьыс вöрöгкöд тышын ёна доймавлiс, куйлiс госпитальын. Чайтiс, мый лэдзасны гортас, но бара мöдöдiсны фронт вылö. Бöръя письмöас гижлiс, мый кер чукöр моз кулöмаясыс кывтöны ю кузя.
1944-öд вося июль кöкъямысöд лунö батьыс пуктiс юрсö немечьяскöд косьын. Гуалiсны Ленинград обласьтса Выборг карын. Повтöмлунысь пасйисны «Красная звезда» орденöн да «За оборону Ленинграда» медальöн.
Нина Васильевнаöс кынöмпöт шедöдöм могысь куим класс велöдчöм бöрын ыстiсны Кулöмдiнö видзны кага. Но пышйис сэтысь да бöр кайис Яковö. Нёль класс и помалiс, гортас отсасис мамыслы. 14 арöсöн бара мöдöдiсны Кулöмдiнö видзны кага. 1951-öд воын пырис уджавны батьтöг-мамтöг кольöм челядьöс видзанiнö. Зiлис куим во, öттшöтш велöдчис рытъя школалöн 5-6-öд классын. Сiйö тупкысис, да том нылöс босьтiсны нянь пöжаланiнö булки вöчан цехö мастерöн.
1957-öд воын Нина Васильевна аддзис ассьыс шудсö, петiс верöс сайö да кайисны овны Яковö. Кыпöдiсны керка. Сэнi гозъялöн чужисны квайт челядь. Верöсыс уджалiс вöрын. Яков грезд тупкысис, да локтiсны овны Носимö. Танi нöшта чужис кык кага. Ань пенсия вылö петтöдз уджалiс Носимын нянь пöжаланiнын.
Мамыслы, кыдз салдат дöвалы, юркарысь сетiсны патера. Бура уна во олiс сэнi. Эз кут вермыны, да Нина Васильевна вайис ас дорас. Куим во на видзис сiйöс. Аньöс нывъясыс нулiсны Выборгö Василий Александрович батьыслöн гу вылö. Зэв мичаинö дзебöмаöсь 14 салдатöс, на лыдын и батьыс. Тыдалö, мый карсаяс тöждысьöны усьöм салдатъяслöн гуяс вöсна, да кокни сьöлöмöн бергöдчис гортас.
Наталья Зезегова,
олöмаяслöн Носимса котырöн веськöдлысьöс вежысь.