Коронавирус паськалö

[ A+ ] /[ A- ]


Миян районын, торйöн нин Мысын, ёна содöма коронавирус инфекцияöн нёрпалысьяслöн лыдыс. Октябр 18-öд лунö вöлi чередтöм чукöртчылöм коронавирус инфекция паськалöмлы водзсасян районса оперативнöй штаблöн. Квайт мортöс Мысысь «пневмония» диагнозöн водтöдiсны бурдöдчанiнö, овмöдчöминын пыртöма карантин. Такöд йитöдын мыссаяслы оз позь ас машинаясöн ни автобусöн некытчö мунны сиктысь да некодлы бокиысь оз позь локны сиктас. Волыны вермасны сöмын отсöг öдйö сетан службасаяс, сёян вайысьяс да мукöд олöм могмöдысьяс. Роспотребнадзорлöн тшöктöм серти висьысьяскöд йитöда йöзлы оз позь петны гортсьыныс, кад кежлö тупкöма школа да клуб, лавка да мукöд йöзаинö ветлыны позьö сöмын маскаöн да резинаысь чуня кепысьöн, öта мöдысь метра да джын ывлаын кутчысьöмöн (социальнöй дистанция). Лавкаö да лекарствола ветлöм кындзи оз позь ветлыны и ывлатi, торйöн нин олöмаджыкъяслы. 
Сиктын дежуритöны поли-цияын уджалысьяс. Найö кутасны видзöдлыны и доку-ментъяс. Та вöсна Тимшер да Лопьювадсаяслы ветлiгöн колö сьöрсьыныс новлöдлыны паспорт. 

Октябрь 20-öд лунö штаб чукöртчылiс выльысь. Тайö кад кежлö серпасыс бурланьö эз вежсьы: висьысьяслöн лыдыс содö да воöдчöма 33 мортöдз, 70 морт бöрся видзöдöны бурдöдысьяс. Коронавирус инфекцияыс сюрöма Турцияысь да Сыктывкарысь воысьяслöн. 
Тестъяс серти кывкöртöд Сыктывкарса лабораторияяссянь воö сёрмöмöн, та вöсна бöрынджык висьысьлöн лыдыс вермас ёна содны, оз кут тырмыны больничаын куйлан места. 
Öнiя кад кежлö лабораторияын сюрöма коронавирус инфекция Кулöмдiн, Дереваннöй, Кебанъёль, Кужба, Дзёль, Ягкöдж, Вылыс Ярашъю, Скöрöдум сиктъясын олысьяслöн. 
Районын нуöдöны вузасянiнъясын да автобусъясын эпидемиология серти корöмъясö кутчысянног бöрся видзöдан рейдъяс. 
Мысын карантин абу на киритöма. Полицияын уджалысьяс торъя видздлас улын кутöны сиктсаясöн роспотребнадзорлысь тшöктöмъяс олöмö пöртöм бöрся. 
Уджаланiнъясöн веськöдлысьяслы колö кывкутöмöн пöртны олöмö республикаса юралысьлысь коронавирус инфекциялы водзсасьöм кузя Указ да роспортебнадзорлысь корöмъяс. 
Торйöн ёна колö виччысьны коронавирус инфекцияысь кулöмаясöс дзебигöн. 
Районса администрация корö стрöга кутчысьны висьöмлы водзсасигöн став корöмъясö. Тайö вöчсьö миянлысь дзоньвидзалун видзöм могысь. Кадыс сьöкыд, но ставсö позьö венны. И тайöс ми вермам вöчны сöмын öтув. Видзöй асьнытö да матыссяснытö! 
Районса администрациялöн сайт вылысь.

Комментарии запрещены.

Осторожно — мошенники!