Копыртам юр…

[ A+ ] /[ A- ]


Май 9 лунö ми 78-öдысь кутам пасйыны Айму вöсна Ыджыд Вермöм. Быд во вöр-ва ловзьöмкöд öттшöтш ловзьылöны война вуджысьяс — сикт-каръясын нуöдсьöны митингъяс, мир туйяс кузя йöз восьлалöны «Кувлытöм полккöд» öтув, кыпыд радлунöн, а то и курыд синва сорöн юргöны кывбуръяс да сьыланкывъяс, гудöк да мукöд ворсан шылад ыззьöдöны сизьдыштны войнаса геройяслысь йöктанъяссö, кодкö со панялö салдатлысь нур… Ставыс мичмöдсьö шаръясöн, дзоридзьясöн, киöн вöчöм мир вайысь лэбачьясöн, сьöкыд воштöмъяса Победалы сиöм серпасъясöн… Быдöнлы тайö долыд луныс виччысяна, дона, войнаын вöвлöм рöдвужöс пöся да аттьöалöмöн, копыра юрöн казьтылана.
Таво Ыджыд Вермöм лун котыртысьяс вöзйöны выльнога да паськыдджыка пасйыны долыд лунсö. Водзын кö восьлавлiм мир туй кузя, чукöртчылiм казьтылана пасъяс дорö митинг вылö, таво Кувлытöм полк мунас öтуввезйын Бессмертнöй полклöн сайт вылын. Мöдöданныд кö войнавывса рöдвужтö на йылысь неыджыд гижöдторйöн — ов, ним, вич, звание, чужан-кувсян кадпасöн, кутшöм войскаын, военнöй операцияясын, кöнi участвуйтiс — аддзывлас став странаыс. Тадзи жö позьö юöртны öнiя торъя военнöй операцияын участвуйтысьяс йылысь. Позьö казьтыштöм ради рöдвуж-ветеранлысь фотокарточка пысавны автомобильö, морöс вылö, öтуввезйын социальнöй листбокö. Нöшта эм сэтшöм мöвп — öтувъя бöрйöминын стенö öшöдны победительяслысь портретъяс.
Миян район пасьтаын пыр мунö фронтовикъясöс, тылын уджалысьясöс, война кадö быдмысьясöс нэм кежлö нимöдöм могысь удж. Обелиск да памятникъяс выльмöдöм, сувтöдöм, геройяслы сиöм музей да «гöрд пельöсъяс» котыртöм, альбомъяс, книгаяс лэдзöм. Сьöлöмсяньыс сюртчöны тайö уджас сиктса ветеранъяс, велöдчысьяс, асшöр веськöдлан котыръяс.
Ыджыд удж вöчöма ичöтик Джеджим грездын паметьö победа дорысьясöс нэммöдöм вылö. Вöвлöм школаса музейын стенъяс тыртöма джеджимсаяслöн фронтовик да тылын уджалысьяслöн фотокарточкаясöн да налöн олантуй гижöдъясöн. Быдöн татысь аддзас ассьыс рöдвужсö, копыртлас юр…
Ария Напалкова.
Гижысьлöн снимок вылын Джеджимса музейыен победительяслöн вежöс.

Комментарии:

Добавить комментарий

Свежий выпуск: 11 апреля

Осторожно — мошенники!