Кокниа кыпалысьяс

[ A+ ] /[ A- ]

Водзтi Нина Анатольевна Петрова вöлi пырö олöмаяслöн Донса котырö, во нёль ачыс нин юрнуöдö сiйöн. Бöръя воясын тшöкыда кылан налöн вермöмъяс йылысь, и спортын, и мукöд нуöданторйын.

— Сиктын спортзалыд эз вöв, социокультурнöй шöрин воссьöмöн кыпалiм ставöн. Пырöдчам спорт шöринöн котыртöм став ордйысьöмын, фестивальын да ворсöмъясын. Радейтам вöлi пионербол, кыдз колö, ворсны эг кужöй. Волiсны кулöмдiнсаяс, велöдiсны. Кольöм воын олöмаяслöн котыръяс пöвстын районса ордйысьöмын лоим медводзынöсь, таво босьтiм коймöд места. Миянлы отсалö-туйдö водзтi физкультура велöдысь Светлана Александровна Тимушева. Спортын водзмöстчöны Ангелина Александровна, сiйö менö вежысь, да Ия Алексеевна Напалковаяс, Элеонора Ивановна Чаланова, Надежда Константиновна Холопова, Раиса Андреевна Липина, — пасйис Нина Анатольевна.

Тöвзьылiсны Помöсдiн дорса Педöр Ёгорö, кылöдчисны катамаранöн, эз повзьыны, кöть сутки зэрис. Ветлiсны «Пожöма яг» шойччанiнö, пырöдчисны ветеранъяслöн туристалан слётö. Донысь витöн петкöдчисны районса öтувъя котыркöд Шойнатыын мунысь фестивальын. Нина Анатольевна ворсiс шашкиöн, Раиса Андреевна — теннисысь, Элеонора Ивановна лыйсис, ворсiс волейболысь, сылöн Андрей Иванович верöсыс — дартсысь. Миян районса котыр лоис
медся бурöн.

Кольöм воын Донса ветеранъяслы фитнес нуöдiс Елена Андреевна Чаланова. Походъясö петалöны тöв и гожöм. Ветлöны вит километра Керчомъяö мунан важ туй кузя. Радейтана местаыс Донты, кöнi вуджöны дiсянь дi вылö, пыралöны вöралысьяслöн керкаö, нимкодясьöны миян вöр-валöн мичлуннас да озырлуннас. Республикалöн чужан лунö сэнi Ангелина Александровна нуöдiс викторина. Тöвнас кö матыстчылöны чери кыйысьяс дорö.

Оз кольччыны и гажъясысь. Социокультурнöй шöринын жö дасьтысьöны. Пуктöны и ворсöмъяс.

Быдлаын водзмöстчысь ветеранъяс быд во пелькöдöны сикт, вузасянiн дорын сикт шöрын вöчисны клумбаяс, асьныс жö и дöзьöритöны, накöд пыр внук-внучкаяс.

— Миян Элеонора Ивановна крестьянин овмöс кутысь, лавкаын вузасьысь, нöшта депутат. Удж вылас и сёрнитас сиктсаяскöд, ышöдас уджад да бурад. Таво дзоридзьяс киськавны, ёг нетшкыны, му небзьöдны волiсны унджыкöн нин. И таысь нимкодь, — водзö сёрнитiс Нина Анатольевна.

Котыр быд во нуöдö «Чужих могил не бывает» паса удж. Шойна вылын асланыс рöдвужлысь гуяскындзи пелькöдöны и мукöдлысь, кодъяслöн сиктын некод нин эз коль либö мунiсны овны мöдлаö.

Топыд йитöдаöсь овмöдчöминса администрациякöд. Ыдждöдлöны-нимöдöны ыджыд арлыда юбилей пасйысьясöс. Таво со пöся чолöмалiсны зарни кöлысь ворсысь куим семьяöс. Асланыс котырö виччысьöны том пенсионеръясöс да водзö водзмöстчыны олöмын.
Марина Дадашова.
Снимок Артур Гарновлöн.

Комментарии:

Добавить комментарий

Свежий выпуск: 22 февраля

https://www.gosuslugi.ru/help/faq/mobile_election/2100910

Осторожно — мошенники!