Март 14-öд лунö Керчомъяын кыпыда мунic «Кадамса марафон» лызьöн котралöм кузя районса ордйысьöм. Таво сiйöс сиисны Керчомъя сиктлы 375 во тырöмлы. Сыктывкар, Кöрткерöс, Кулöмдiн, Помöсдiн, Дон, Керчомъя, Скöрöдум, Парч, Лебежнöй сикт-грездъясысь котöртiсны 70 сайö морт. Лызьöн котравны радейтысьяслы вöлi вöзйöма нёль дистанция. Медся кузьыс Кадам тыöдз да бöр — 18 километра. Кыдзи и быд во, таво лыжиöн котöртiсны тшöтш семьяясöн — Скöрöдумысь Шомысовъяс, Кулöмдiнысь Тарабукинъяс, Керчомъяысь Логиновъяс, Сыктывкарысь Напалковъяс да Донысь Чалановъяс.

Луныс вöлi шондiа да мича. Керчомъяса культура керка дорын гаж заводитчис водз асывсяньыс. Бипур вылын пуисны чöскыд юква, рок, тшай. Быдöн вермис нуръясьны тувсовъя ывлаын чöскыд сёян-юанöн. Локтысьясöс пасйöм бöрын спорт праздник восьтiс «Кыпыд лов» сьылан котыр. Баян улö юргисны «Шойччы да шонтысь» да «Коми муын» сьыланкывъяс. Та бöрын кывсö босьтiс лыжиöн котралысьяслöн районса федерацияöн веськöдлысь, лызьöн котралöм кузя чемпион Алексей Михайлович Тарабукин. Сiйö чолöмалiс спорткöд ёртасьысьясöс кыпыд лунöн да восьтiс гажсö. Районса спорт шöринын уджалысьяс тöдмöдiсны правилöясöн. Водзö йöктiсны Керчомъяса школаысь 8-öд классын велöдчысьяс.

Сэсся ставныс лэччисны Вад ты дорö. Культура керкасянь веськыда абу и ылын. Сэнi бара жö сулалiс автоклуб, кодсянь юргисны кыпыд сьыланкывъяс, быд котöртысьöс стöчмöдалiсны микрофон пыр. Та кындзи видзöдысьяслысь босьтiсны неыджыд интервью. Тöдчис, кыдзи Керчомсаяс ёна радейтöны чужан сиктсö да землякъяссö.
Котралiсны кык часысь дырджык. Медся ичöтъясыс воисны Скöрöдумысь – тайö Паша да Катя Шомысовъяс. Медся ыджыд сямаöн лыддисны Керчомъяысь Иван Егорович Тарабукинöс.
Куим километра вылын медводдза места босьтiсны Скöрöдумысь Елена Шомысова да Сыктывкарысь Алексей Напалков. Мöдöн лоисны Скöрöдумысь Валентина Шомысова да Керчомъяысь Артём Жикин. Коймöдöн воисны Керчомъяысь Любовь Булышева да Василий Самарин.
Квайт километра медся тэрыба котöртiсны Кулöмдiнысь Наталья Пашнина да Керчомъяысь Иван Тарабукин. Мöдöн лоисны Кулöмдiнысь Евгения Ерчина да Керчомъяысь Иван Тарабукин. Коймöд тшупöда награда вичмис Керчомъяысь Евдокия Кочановалы да Дмитрий Ваддоровлы.
Медся кузь дистанциын Кадамöдз да бöр зарни медаль босьтiсны Помöсдiнысь Алексей Уляшев да Сыктывкарысь Анастасия Рудакова, биатлон кузя Коми республикаса чемпион. Мöдöн воисны Скöрöдумысь Василий Шомысов да Кöрткерöсысь Елена Мяндина. Коймöдöн лоисны Кулöмдiнысь Николай Нестеров да Ольга Сладкоштиева.
Абсолютнöй чемпионъясöн пасйисны Алексей Уляшевöс да Анастасия Рудаковаöс.
Кадамса марафонын быд петкöдчысьлы да вермысьлы вичмисны грамотаяс, медальяс да спонсоръяссянь козинъяс.
Артур Гарнов.
Снимокъяс гижысьлöн да спорт шöринлöн.