Февраль 2627–öд лунъясö Кулöмдiнса шöр школаын кыпыда мунiс «Вося велöдысь» конкурс. Ассьыныс сямнысö, кужöмлуннысö да тöдöмлуннысö таво петкöдлiсны сöмын челядькöд дыр нин уджалысьяс. Тайö – Помöсдiнса школаысь физкультура велöдысь Галина Павловна Андреева, татысь жö англия кыв велöдысь Анна Ивановна Лажанева, Зимстанса школаысь роч кыв да литература велöдысь Ирина Геннадиевна Козырева, Вочса школаысь история велöдысь Галина Ивановна Литош да Кулöмдiнса школаын труд (технология) велöдысь Елена Александровна Юшкова, кодъяс чуймöдiсны челядьлы тöдöмлунъяс аслысногöн сетöмöн, босьтöм темалысь сюрöссö кужöмöн восьтöмöн да мукöдторйöн. И кöть урок, кöть класснöй час ли мастер-класс нуöдiгöн. Быдöн, збыльысь, дзирдыштiсны ыджыд сямöн, енбиалунöн, и, дерт жö, жюрилы сьöкыд вöлi бöрйыны медбурсö. Быд боксянь артыштöмöн векжö медвылö донъялiсны Е.А.Юшковалысь петкöдчöмсö.

– Да, таво петкöдчисны сöмын уна во нин уджалысьяс и, колö шуны, зэв бура, – висьталiс велöдан управлениеысь юкöнöн веськöдлысь Наталия Николаевна Нестерова. – Конкурс серти став урчитöмсö нуöдiсны зэв интереснöя. Но векжö медбурöн пасйим Елена Александровна Юшковалысь петкöдчöмсö, сы вöсна мый сiйö найöс нуöдiс стöча государствоöн индöм стандартъяс серти: лöсялiсны тэчасног и нуöданног сертиыс, индöм кадыслы, кужис чуймöдны челядьöс сетöм выль тöдöмлунъясöн, ышöдны öтув уджавны да с.в. И мый медтöдчана, кужис лючки донъявны ассьыс нуöданторъяссö.

Елена Александровна ачыс Лузабердса Абъячойысь. 1996–öд воын локтiс миян районö, овмöдчис Кужйö. 1998–öд восянь уджалiс сэтчöс школаын старшöй пионервожатöйöн, библиотекарöн, экономика, физкультура да труд (технология) велöдысьöн, 2014–öд восянь – Кулöмдiнса школаын труд (технология) урок нуöдысьöн. Та дыра челядькöд зiльöмöн, уджас пыр водзмöстчöмöн да содтöд мывкыдлун öтарö босьтöмöн шедöдiс нин ыджыд сям. И эз весьшöрö ло конкурсас вермысьöн.

– Татшöм конкурсын ме петкöдчылi нин вит во сайын, и öнi тöдi нин мый сiйö сэтшöмыс, кыдзи кутчысьны, мыйöн чуйдны, – тöдчöдiс Елена Александровна. – Урчитöм могъясын зiли петкöдлыны уна воöн чукöртöм кужöмлунъясöс, тöдöмлунъясöс, кыдзи найöс пыртны челядькöд уджö, найöс лючки велöдöмö. Нимкодь, мый донъялiсны бура. Аттьö менам уджъёртъяслы – Ольга Владимировна Пунеговалы, Людмила Ивановна Стрельниковалы, Георгий Алексеевич Ракинлы, Алексей Александрович да Вера Леонидовна Корецкийяслы, кодъяс отсасисны меным конкурс кежлö дасьтысигöн и петкöдчигöн.
Кольö сöмын чолöмавны Елена Александровна Юшковаöс ыджыд вермöм шедöдöмöн.
Галина Нестерова.
Снимок Вера Корецкаялöн.