Кöсйигöн ставыс артмö

Миян странаын уна сюрс морт олöны китöг. Кодкö чужис тадзи, а кодкö воштiс кисö виччысьтöм неминучаын. Татшöмъяссö талун шуöны ичöт позянлуна йöзöн. Донысь Алексей Липин 21 во нин олö кыкнан китöгыс. Но сыкöд паныдасигöн пыр и вунöдан, мый тэ водзын сулалö китöм морт. Дум вылö воö бур сьöлöма уджач коми зон. И позянлуныс сылöн ёна унджык. Сiдзкö, мортлöн олöмыс оз мыджсьы ки-кок вылö, а ёнджыкасö юр вежöр да сьöлöм вылö. Кутшöма мöвпалö мортыс, кутшöм сьöлöмöн видзöдö ас гöгöрыс, сэтшöмöн и лоö сылöн олöмыс.
Алексей муса Наталья гöтырыскöд быдтöны нёль челядьöс. Тшöкыда позьö аддзыны, кыдзи бать нуö Алиса ичöт нывсö садйö. Пуксьöдö даддьö да кöв отсöгöн кыскö сiйöс кытчö колö. Тшöкыда колльöдö да паныдалö муса гöтырсö уджаланiнсяньыс лавкаысь. Алексей Александровичлы индыны удж оз ков, ставсö аддзö да вöчö водзвыв — заптö пес, чеччö медводдзаöн да ломтö пач, дзоньталö мый колö, ветлö вотчыны да кыйны чери. Öти сиктын олысьяс тшöкыда аддзывлöны, кыдзи Алексей ачыс заптö пес, весалö лым, новлö лыа да мукöдтор. Дерт, сылы мойвиис шуда семьяöн, ёртъясöн да бур суседъясöн. Унатор вöчöны и öтув. Коркö сы дорö локтöма суседыс да аддзöма, кыдзи Алексей керкалöн вевт вывсянь ачыс öшöдö зэра ва ортсö лэдзан жöлöб. Öти кокнас кутö, а мöднас уджалö шуруповёрт отсöгöн. Отсöг сылы эз и ковмы, ставсö вöчöма ачыс кокъяс отöгöн. Сёрнитны телепонöн да пукавны интернетын отсалöны ныр да кыв. Алексей бура ворсö шахматысь. Воддза воын пырöдчис районса спорт фестивальö.
Таво том морт вöчис ыджыд керкаын торъя ломтысянiн, медым позис кокньыда пыртны пес да ломтыны пач. Водзö мöвпалö нин кутшöмöн лоö выль пывсян. Ньöбис гортас шылад ворсан аппаратура да мукöдтор. Таво сiйö кызьысь ветлiс нюрö, вотчис турипув вотан комбайн кокас пысалöмöн. Мортыс оз няргы, оз ропкы, уджалö да видзö семья. Тадзи и колö овны быдöнлы, ёнджыкасö нин налы, кодлöн эм ставыс вöльнöй светын öтчыд олiгöн.
Пасъям, талун районын лыддьысьö 1845 вермытöм, на пöвстысь 98-ыс челядь. Медводдза группаа инвалидъяслöн лыдыс 295, мöд группаа – 639, коймöд группаа 813 морт. 902 ань, 845 мужичöй. Медся уналöн вир ветлан висьöм, сэсся лёк пыкöс, коймöд местаын мунöны лёка аддзысь да лёка кылысь йöз.
Артур Гарнов.
Снимок вылын Алексей Липин Алиса нылыскöд.