Мед пыр вöлi югыд

Лунвыв электрическöй сетьяслöн районса юкöнын зiльысь электромонтёрлы абу тырмымöн öти специальносьтыд, удж вывсянь велöдöны содтöд и мукöдö. Иван Николаевич Пахомов танi 2013-öд восянь. Уджалiгмоз велöдчис стропальщикö, домалö да мездö сюръяяс; люлькаса рабочöйö, электромонтёр йитö провод либö вöчö мöд удж машинавывса лэптöм люлькасянь; пöрöдчысьö, би визь улысь пилитö кустъяс, проводъяслань вежыньтчöм сiсь пуяс да с.в.

Иван Николаевич Шöръягысь. Школа бöрын целлюлоза да бумага вöчан Сыктывыкарса техникумын велöдчис техник-электрикö. Армияын служитöм бöрын кольччылiс карö, корсис удж, но быдлаын тай корöмъясысь öти — мед мортыс кöнкö да уджавлiс нин водзтi. Сiдзи эз пукав, пырис оланiнъяс дзоньталан котырö электрикöн. Шыöдчылiс вневедомственнöй охранаö, лунвыв электрическöй сетьяслöн районса юкöнö, но лёка аддзис, да эз босьтны. А öд специальносьтсö бöрйис сьöлöм сертиыс. Сэки и шуис вöчны синмас операция. И туйыд воссис. Выльысь вöзйысис биöн могмöдысьяс дорö. Веськалiс Владимир Андреевич Кочановлöн котырö, зiлис и мастер Андрей Валентинович Лютоевлöн бригадаын. Буретш вöлi тöв, поводдялöн вывтiасьöм бöрын мунiсны лыжиöн би визь увтi, вачкалiсны-пыркöдiсны провод вылö öшйöм лымсö. Казялiсны орöминъяс, ыджыд сяма уджалысьяс йитiсны, а Иван Николаевич отсасис, кыскис проводсö. Дыр уджалысьяс туйдiсны-велöдiсны том мортöс. Быд лун петöны туйö. Кöнкö выльмöдöны би визь, кöнкö дзоньталöны. Паськалöны сиктлöн юкöнъяс, кыпалöны выль керкаяс. Талун уджалöны Кулöмдiнлöн Юбилейнöй юкöнын, кöнi сеталiсны му юкöнъяс, да йöзыс лэптöны нин выль оланiнъяс. Кöкъямыс участокöдз нюжöдiсны нин би, во помöдз кöлö нöшта сизимлы, локтан воын квайтлы.

Уджалöны оз сöмын районын. Иван Николаевич биöн могмöдысьяскöд ветлiс Удораö, отсалiсны сэтчöс юкöнлы вежны би визь, сувтöдны сюръяяс. Карелияын вöлi велöдчöм сяма, кöнi чукöртчис уна котыр, да весалiсны кустъясысь би визь ув. Псковын отсасисны йиа зэр бöрын битöг кольöм карлы.

Гортас пыр виччысьöны муса гöтырыс да нёль челядь. Квайт арöса пиыс босьтлö нин инструментъяс, тэ моз жö пö кута кавшасьны сюръяяс вылö, мед миян да мукöд олысьыслöн керкаясын пыр вöлi югыд.
Марина Дадашова.
Снимок Андрей Лютоевлöн.