Весиг Сочиын, и Псковын

— Вöв сийöсысь на сьöкыдджык, — уджавны лöсьöдчигöн ас выланыс став коланасö кышалiгöн да босьтiгöн тадзи шмонитöны электромонтёръяс. Сюръя вылö кайны «сатшкысян гыжъяс», сюръя бердö пысасян да усьöмысь видзан-кутан ён тасма да мукöдтор. Каскаыс сигнал сетан торъя прибора, проводыс кö тока, заводитö чипсыны. Уджалан паськöмыс оз ыпнит, оз сотчы. И тадзи туйö петöны кöдзыд кöть зэрö, жар кöть турöбалö, бырöдöны поводдялöн вывтiасьöмысь жугалöминъяс, дзоньтасьöны. Нелючкияс бырöдны дасьöсь лун и вой, шойччан да праздник лунъясö, мед миян керкаясын да уджаланiнъясын пыр вöлi югыд да шоныд.
Со татшöм сьöкыд, но кывкутна удж бöрйис Кулöмдiнысь Александр Николаевич Рассыхаев. Электрикö велöдчис Сыктывдiн районса Выльгортын мöдöд номера училищеын. Лунвыв электрическöй сетьяслöн районса юкöнын практика дырйи петкöдлiс бур сям да тöдöмлун. Сэнi местаыс эз вöв, да армия бöрын уджыштiс нянь пöжаланiнын, 2004-öд воын корисны Владимир Андреевич Кочанов мастерлöн бригадаö. Буретш ыджыд удж бергöдiсны Дереваннöйын, сэнi Олег Яковлевич Старцевлöн бригада вежлалiс сюръяяс, нюжöдiсны выль би провод, накöд öтув уджалiсны и мукöд бригадаяс. Выль би визьяс нюжöдiсны и мукöдлаын. Тшöкыда районö петалiс би арталан юкöнса уджалысьяскöд, кытшовтiсны сикт-посёлокъясса керкаяс, пасъялiсны би арталан приборысь лыдпасъяссö, «тшапкылiсны» би гусялысьясöс. Ветлöны командировкаясö. 2013-öд воын Александр Николаевичöс биöн могмöдысьяслöн Рытыв-Войвыв кытшын уджалысьяскöд ыстылiсны Сочиö, олимпиада кежлö нюжöдiсны би визь. Сiйö жö воын Удораын би визь лöсьöдiсны тöвныр мунöм бöрын. Таво январын Андрей Валентинович Лютоевлöн бригадакöд ветлiс Псковö, кöнi йиа зэр бöрын ыджыд кар кольлiс битöг.
Аддзысьлiгöн лöсьöдчисны петны Пармаö, войнас сэнi куслiс биыс. Тыдалö лёк поводяöн лымйыс öшйис провод вылö. Ковмас вачкалыштны-пыркöдыштны, кöть и, позьö шуны вöр шöрын, некымын олысь, но налöн мед пыр вöлi югыд.
Марина Юрьева.
Снимок вылын Александр Николаевич Рассыхаев.