Сöветскöй уличавывса ас керкаö мунiг-локтiгöн тайö нывбабаыскöд паныдасьлi тшöкыда. Мыйлакö весиг чолöмасьлiм, кöть нимсö эг тöд. Ичöтик тушаа, косiник, тэрыб вöраса, пыр небыдик нюма да шоныд видзöдласа – дзик Геннадий Юшковлöн кывбурысь «Коми ань» кодьыс. Но некор эг аддзыв культура керкаысь, ывлавывса мукöд гажъяс вылысь, йöз чукöрысь. Татшöм йöзсö, лöниника, ас кежысь олысьяссö менам пöч шулiс «тöлысьвывсаöн». Сэк эг юасьлы, а öнi шуöмсö восьтыны сьöкыд. Чуймалысьлы тай шуласны жö, тöлысь вылысь пö усин?

Во вит сайын, интернетлöн юöръясысь аддзи спортын нималысьяскöд менсьым тöдсаöс. Öтчыд да мöдысь, и пыр вермысьяс лыдын. А сэсся лыддьысянiнын веськалiм öтлаын. Бöрйöма некымын небöг, мед пö дырджык не волыны. «Радейта лыддьысьны. Небöгкöд шогöс вунöдла, ачымöс шойччöдышта. Коркö газет-журнал гортö уна судзöдлi, öнi ог. Татысь жö босьтла», – висьтасис.
Галина Ивановна Попова вöлöма варов, да небöг вежысь дорö öчеред виччысигмоз и артмис тöдмасьöмным. Ачыс Парчысь, но томöн на овмöдчывлöма Кулöмдiнö, стрöитчысьяслöн овмöс быртöдз уджалöма кассирöн да бухгалтерöн, сэсся пелькöдчöма.

– Спортыдкöд важöн ёртасян? – юалi.
– Пенсия вылö петi 61 арöсöн. Майбыр, удж вылö оз ков тэрмасьны, челядь быдмисны, асьныс олöны. Лун-мöд шойччи, сэсся кутi мöвпавны, мый вöчны лунтыръяснас. Культура юкöнö менö оз кыскы, абу велалöма, гортса овмöс абу жö. Ыджыд мамöн шуысь бöрся кольöм лыжъяс босьтi да петi совхозлöн коркöя му вылö, кытысь аддзывла ислалысьясöс. Аслым лоис яндзим, воськовтны ог куж да.
– Быдмигад мöй лыжнад эн котравлы?
– Парч гöгöрын чойясыс джуджыдöсь да медсясö дадьясöн иславлiм. Менам гортын весиг лыжыс эз вöв. А школаын велöдчигöн физкультура дырйи, дерт, лыж вылад сувтлiм жö, но менам эз вöв мог спортсменöн лоны да ачымöс ёнасö эг пес.

Менам сьöлöм пыр тшöктö: он куж – велöдчы. Лыж вылö медводдза сувтöмсянь тадз жö артмис. Босьтчи велöдчыны медводз кутчысьны да восьлавны, сэсся иславны да котравны. Ыджыд отсöг сетiс Екатерина Зюзева, кодкöд быд лун петавлiм лыж туй вылö. Ветлывлiм и «Пожöма ягö», кöнi пыр эмöсь ислалысьяс. Öнi ветла лыжнöй база вылö да муна 10 километрысь ог этша.
Вын да кужöмлун чöжны ветла и «Олимпикö», ачымöс песа гортын да ывла вылын. Сюртчи тшöтш ветеранъяслöн «Дзоньвидзалун» котырö. Накöд зэв гажа, аньяс, арлыд вылö видзöдтöг, вöчöны ыджыд удж, пöльзаöн коллялöны прöст кад.

Галина Ивановна вежавидзысь да оз радейт ошйысьны, ачым мыйсюрö содта спорт юкöнсянь висьталöмысь. Сёрöн сувтiс спорт туйö, но удитiс шедöдны выльысь выль вермöмъяс. Уна во нин петавлö район да республика тшупöда ордйысьöмъясö, тöвнас – лызьöн, гожöмнас – котралö. ГТО-лöн фестиваль вылын кык во дорвыв босьтiс медводдза местаяс, шедöдiс кык зарни пас ГТО-лысь корöмъяс бура вöчöмысь.

Лыж пöрччытöдз на босьтчö дасьтысьны гожся ордйысьöмъяс кежлö да водз тулыссянь быд асыв кад арталöмöн котöртö вель кузь туй. Оз пов кузь туйясысь, лыжиöн котöртiс Кадамса марафон, велосипедöн мунiс 40 километр.

– Кытысь босьтанныд аслыныд вын?
– Ме дзолясянь вöлi визув, татшöм и öнi, весь пукавны ог вермы. Челядьдырсянь отсаси мамлы совхоз уджъяс вылын да гортын, тöв кöть гожöм ворсiм ывла вылын, гожöмбыд вотчим, купайтчим, Немдiнын велöдчигöн öтарö и мöдарö ветлiм подöн. Чайта, пессьöм-уджалöмыс лöсялö мортлы, да тайöн жö кута ачымöс. Спортыд удж жö, вель на и сьöкыд.

Ныв гозъя меным козьналiсны выль лыж гоз, дзик меным лöсялана кокнидик кöмöн. Мед тöлыс сетас вын да гылыд ислалöм. Гортысь быд петiгöн аслым тадз сиа.
Нина Буткина.
Снимокъяс Галина Поповалöн.