Эм татшöм коми шусьöг: «Дыш висьöм – медся омöль висьöм». Но сiйö оз лöсяв, Донысь Мишаринъяслöн семьялы, тайö лёкыс налы эз кöвъясьлы. Талун налöн овмöсын кык мöс, öшпи да кукань. Водзтi Елена Алексеевна да Юрий Александрович видзлiсны куим мoскöдз, но 2018-öд воын вузалiсны бöръя коньöйöс да колисны скöттöг.
Гожöмын уджыд век тырмö. Но тöлыд скöттöгыд кузь да гажтöм. «Верöс да Роман пи ёна радейтöны кыйны чери. Ме, эськö, ветла жö вöлi накöд Дон тыад, но ог сэтшöм тшöкыда,» — юксис Елена. И медым эз ковмы гортын овны весь, воис мöвп – бöр босьтчыны видзны скöт. Гозъя пенсия вылынöсь нин, да сёрнитöм бöрын шуисны, мый асшöр уджö босьтчас Роман пиыс. Сiйö челядьдырсянь отсасис овмöсын, эз повзьывлы сьöкыдысь ни куйöд дукысь. Ас нянь вылö петны отсалiс уджöн могмöдан шöрин, сетiс сьöма отсöг. Кольöм вося мартсянь том морт крестьянин овмöс кутысь.
Медводз Мишаринъяс шыöдчисны Донын ферма кутысь Сергей Алексеевич Тимушев дорö. Фермер ачыс содтысьö скöт юр лыдöн да мöс эз вузав, а вöзйис ветлыны сыкöд тшöтш Сыктыв районын Межадорса видз-му овмöс котырö бöрйыны да вайны мöсъясöс. 2019-öд вося март 19-öд лунö найö петiсны туйö. Сэнi петкoдлiсны вит мöскöс да тшöктiсны бöрйыны аслыныс. Елена Алексеевналы сьöлöм вылас воис кык сюрук — öтиыс вöлi дзик аслас воддза Белка мöс кодьыс, мöдыслöн синмас шыбитчис статьыс. Сiйö жö лунö Сергей Алексеевич и вайис Мишаринъяслы Груша да Чоюк нима мöсъясöс. Межадорса Груша вöлi тыра нин да ноябрын вайис öшпиöс. Кöть ачыс ичöтик на, сетiсны зэв аслыспöлöс ним. Шуисны Министрöн. Министр нима пö вöлi ыджыд öш батьыс. Сэтшöм жö ним вичмис и Донын чужöм öшпилы. Таво мартын Чоюк вайис коньööс. Бара жö дыр эз мöвпавны, чужан тöлысь серти шуисны Мартаöн. Дзоньталöм да выльмöдöм гидын лоис нёль скöт юр. Йöв разöдöны донсаяслы да Кулöмдiнö. Асьныс вöчöны рысь да ёнджыкасö кефир, кодöс ёна радейтöны ая-пиа.
Кольöм вося гожöм вöлi ёна зэраöн. Мишаринъяс висьталiсны, мый августын Енмыс сетiс налы кык шондiа лун. Асланыс видзьясыс вöлiны ва улын да, öти сиктын олысь Сергей Борисович эз бöрыньт — сетiс ассьыс турун пуктан мусö. Сылысь видзьяссö ва эз босьтлы, туйыс сэтчöдз бурджык да и матынджык. Донса трактор кутысьяс ытшкисны, куртiсны да топöдiсны да вöчисны тюкъяс.
Талун кежлö Мишаринъясöс майшöдлö, мый турун колис этша, виччысьöны, кор нин воссяс му да петас веж турун. Пенсияöдз Елена уджавлiс бухгалтерöн сиктса администрацияын. Сiйö и бергöдö бумага уджсö. Висьталiс, мый налы позис, эськö, водзö паськöдчыны, содтысьны скöтöн, но керка йöрыс абу сэтшöм ыджыд. Ковмас öд и выль гид вöчны. И тайö мöвпыс век юраныс. Но ставыс на водзын.
Артур Гарнов.
Снимок гижысьлöн.