Вöрыд стрöг
(Ичöтик висьт)

Öти арся лунö, кор ме ичöтджык на вöлі, ар сизима кымын, ми батькöд ветлім Пасаö (тадз местаыс шусьö) пув вотны. Кöкъямыс километр машинаöн мунöм бöрын заводитчис лёкиник, няйт гуранъяса, туй. Ковмис батькöд нопъяснымöс босьтны да водзö сэсся подöн мунны. Недыр кад мысти воим Вöль ю дорöдз. Батьöй перйис нопсьыс резина пыж да заводитіс пöльтны сійöс. Ме, дерт, отсаси жö. Недыр мысти пыжыс пöльтчис. Ме öдйöкодь пукси пыжас, а батьöй пелысöн берегсянь йöткыштчис. Юсö вуджигöн ме чуйми, кыдзи сöстöм ваын уялiсны быдсяма черияс. Вöль юлöн мöдар берегас воöм бöрын мöдім сэсся вöрса видз бокті. Кутшöмкö кад мысти воим вöр керкаöдз. Сэтчö пыртöдз батьöй гольöдчыштiс öдзöсас. Вомгорулас шуис: «Тук-тук, керка! Воим тай, керка-матушкаöй. Шойччыштам танi. Бурысь лэдз». Пыр жö ломтiм пач. Бур, мый кос пескыд вöр керкаад, майбыр, век эм. Абу на став йöзыс ловнас дуркмöмаöсь, прамöй «вöрсаясыд» эмöсь на. Миянöдз волысьяс тай кос пессö кольöмаöсь-а.. Тöдöны, буракö, мый и на бöрын на кодкö локтас татчö шойччыштны-шонтысьыштны.
Пач ломтöм бöрын ме тэрмасьтöг босьтчи перъявны нопйысь сёян да мукöд шылльö-мылльö, тэчны ставсö ящикö. Ывлаыс вочасöн кутіс рöмдыны, а батьлöн вöлі пусьöма нин шыд. Ми пуксим сёйны. Ок и чöскыд жö вöлі шыдыс! Öнöдз дулльöй петö. Дзикöдз пемдöм бöрын сэсся водім узьны. А бать кутiс казьтывлыны, кыдз ичöтдырйиыс на волывлöма татчö аслас батьыскöд, менам пöлькöд. Быдсяма шензьöданаторйыс пö вöрад овлö! Пöльöй унатор йылысь висьтавлöма батьлы: вöрсаяс, васаяс да мукöдтор йылысь. А öні со бать нин мен висьтавлö!
Вöр керкаад, чöскыд вöрса дукнад лолалöм бöрад, зэв кокниа узьсьö. Ме пыр и ланьті, весиг батьлысь сёрнисö помöдз эг удит кывзыны.
Асывнас палялі лэбачьяслöн гажаа сильгöм-дзользьöмысь. Лэччи мыссьыштны вöрса шор дорö. Сэні вöлі сöдз югыд ва, тыдалісны быдсямапöлöс изъяс. Пöтмöн мыссьöм бöрын, вежöр пальöдöм бöрын, котöрöн кайи вöр керкалань. Батьöй вöлі шонтöма нин шыд. Удитö тай, меысь ёна водз чеччö. Нуръясьыштöм бöрын ми сэсся долыдпырысь вöрзьöдчим нюрлань: колö вöлі пув вотыштны. Неылö муныштöм бöрын тыдовтчис пувъя места. Ок и уна пувйыс! Кык час мысти нин миян батькöд дозмукъясным тырисны. Бöр ковмис мунны шоныд вöр керкалань.

… А сэсся мöд луннас бара на воддза местаад ветлім. Но пувйыд эз нин вöв (кодъяскö миян бöрын удитöмаöсь вотны). Мунім нюр саяс. Батьöй шуис, мый нюр саяс меститчöма пувъя яг. Нюр дорö матыстчöм бöрын медпервой батьöй видзöдліс, ёна-ö васöд нюрыс. Сэсся шуис: «Вуджам». Ме — бать бöрся. Но ылалі мырпом вылö. Öти вотöс вомö сюйи, мöдöс…Бать ылыстчис нин. И сэк ме бузгыси нюрас. Коскöдз вöйи. Батьлы горза: «Батьö, отсав!». Бледöдöм чужöмöн бать уськöдчис ме дорö да кыскыштіс ва гурансьыс. И стрöга шуис: «Вöрад некор ловнад эн личöдчы! Быд здук дасьöн ло! Вöрыд — стрöг! Кыяс. И — виас, ковмас кö».
Батьлысь кывъяссö ме öнöдз помнита.
Константин Уляшев.
Помöсдiн.