Кольöм вося декабр 22-öд лунö Югыдъягса культура керкаысь «Югыдлань», «Сударушки» да «Мадаяс» котыръяс ветлiсны Тимшерö да пестiсны ыджыд гаж. Юргисны кыпыд да мыла сьыланкывъяс, мича, ён гöлöсъясöн босьталiсны «Югыдлань» да «Мадаяс» котыръясысь Елизавета Ануфриевна Карманова, Василий Александрович Тюрнин, Ангелина Ивановна Ковальчук да Татьяна Ивановна Игнатова. «Сударушки» котыр вöрзьöдiс видзöдысьяслысь сьöлöмсö мичаа йöктöмнас да яръюгыд паськöмнас. «Мадаяс» котырсаяс, арлыд вылö видзöдтöг, «Ижемский платок» да «Радуга» шылад улö зэв на винёла йöктiсны кытшö сувтöмöн. Тимшерса олысьяс шоныда вочаалiсны быд петкöдчöм, а помас кекöначисны сувтöмöн. Котыръясö ветлысьяс нимсянь да налöн корöмöн аттьöалам автобусса водитель Валерий Юрьевич Морозовöс, а сiдзжö асшöр уджалысь Виктор Васильевич Белыйöс да Сергей Викторович Афанасьевöс транспорт вичмöдöмысь. Аттьö и Тимшерса клубöн веськöдлысь Екатерина Степановна Фаныгиналы бура вочаалöмысь, пöсь чайöн да юмовторъясöн чöсмöдлöмысь. Тимшерса гажöдан котыръясöс виччысям водзöсöн волыны миян культура керкаö.
Кулöмдiн район озыр енбиа йöзöн. Мед татшöм аддзысьлöмъясыс лоасны пыр. Миянлы зэв нимкодь тöдмасьны да паныдасьлыны выль йöзкöд, видзöдны выль гажъяс. Ставныслы сиам гажаа пасйыны Выль вося лунъяс, кыпыдлун, ён дзоньвидзалун, быд уджын вермöмъяс. 2020-öд воын мед олöмныд лоас югыдджык.
Валентина Юшкова,
олöмаяслöн Югыдъягса котырöн веськöдлысь.