Талун миян гöсьт — Любовь Васильевна Кирушева, ныв дырйиыс — Лодыгина. Чужлiс Габов грездын, олö Кöрткерöсын. Неважöн босьтчис гижны висьтъяс.

Кодi нö ичöт дырйи оз радейт купайтчыны?! Торйöн нин ю дорын быдмигöн. Апрель помын заводитам бульскöдчыны Варламув видз вывса ыджыд ва гуранъясын, миянкöд тшöтш везъялöны ва чераньяс. Ты бокын кульмöны лягушаяс да быдмö купальнича. Гортад локтан, да мамыд юалас: «Лунтыр купайтчинныд?» Ми, дерт, шуам, мый эг. Но сiйö сералöмöн: «Чужöмныд вушйöма да!» Со и ми ассьыным нин челядьнымöс, кöть мыйöн эгö повзьöдлöй, найö сiдзжö уялiсны. А кымын оз позь, ёнджык окота. Ме весиг висьтавлi, мый менам эм подзорнöй труба, кодi ставсö аддзö, да лунтыр кута видзöдны, кöнi пиукöй лоас. Но рытнас воис дзик кельыд чужöма.

• Мый, бара купайтчинныд? — шуа ме.
• Эг!
• Эн, дерт, чужöмыд вушйöма да!