Паськыда тöдса сьыланкывйын эм строка: «В этой деревне огни не погашены». Тадз жö позьö шуны и Кулöмдiн районса Габов грезд йылысь.
Öнi сэнi олö дас куим морт, а Габовын чужлöм войтыр – Лодыгинъяс, Таскаевъяс, Шучалинъяс, Юргелевичьяс, Логиновъяс – выль ловшы кöсйöны сетны грездыслы.
2014 вося гожöмын Сыктывкарса да Коми-зыряналöн епископ Питиримлöн бласлöвитöмöн габовсаяс кыпöдiсны Георгий Победоносец нимöн вежöдöм часовня. 24 морт мунлöма Габовысь Айму вöсна Ыджыд тыш вылö, бöрсö воöмаöсь сöмын дас öтиöн. Часовняыс лоис найöс казьтылан пасöн.
2019 вося гожöмын заводитiсны дзоньтавны Павел Иванович Лодыгинлысь керкасö. Салдат усьöма Курск дорын 1943 вося июль 9 лунö. Ловзьöдны керкасö корöма нылыс, Августа Павловна Лодыгина. Тадзи чужис «Габовын салдат керка» уджтас, став мирöн чукöртiсны сьöм. Июльнас гöгöр ойдлiс да тшыкöдiс туйяс, но та вылö видзöдтöг керкасö сувтöдiсны зумыд подув вылö, вежисны кык улыс венечсö, выльмöдiсны вевтсö, а сарай пыддиыс лэптiсны выль стрöйба.
Керкасö 1919 воын на кыпöдлöма Виссарион Никитович Лодыгин, а сё во мысти сiйö быттьö выльысь чужис да нöшта на сё во сулалас.
2020 вося гожöмын Габовö воласны Ю.А.Спиридонов нима искусство гимназияын велöдчысьяс. Тайö лоас налöн коймöд волöмöн нин. Воддза кык экспедицияыс, 2014 да 2015 воясö, шусисны «Енкола дорö туйöн», а та пöрйö – «Гортö туйöн». Салдат керкаын найö кöсйöны лöсьöдны народнöй музей: гижавны олöма войтырлысь казьтылöмъяс, чукöртны снимокъяс, важ кöлуй. Агния Матвеевна Габова (грездса ног кö – Матвей Агни) козьналiс нин музейö лузан, а Анна Андреевна Морохина (Öндрей Анна) – ас киöн вурöм дöрöм, сарапан, а сiдзжö кöтi, мичаа серпасалöм кык ниран. Öндрей Анна абу нин ловъя, но гимназистъяслы 1991 воö на сыöн кознавлöм эмбурыс олö да водзö кутас овны грездса музейын.
Коми Республикаса народнöй поэт Василий Лодыгинлöн вöзйöм серти 2017 воö часовня-памятниккöд орччöн сувтöдiсны грездлы 200 во тырöмлы сиöм пас.
Йöзлöн висьталöм серти, медводдзаöн овмöдчылöма сэтчö Носимысь Иван Гаврилович Лодыгин (Габö Иван), а документъясын грезд йывсьыс медводдза пасйöдыс вöлöма 1817 воö. М.Мацуклöн да В.Шаньгинлöн «Торговля и пути сообщения в Коми крае в XIX веке» небöгысь позьö лыддьыны, мый кык нэм сайын Габов дортi мунлöма Камасянь Эжва вожö нянь новлан туй. Тöвнас ветлывлöмаöсь вöла-доддяöн, гожöмнас – пыжъясöн. Нянь туйнас вöдитчылiсны XIX нэм шöрöдз.
Абу кокни öнi Габовын олöмыс. Но бурланьö воськовъяс эмöсь жö. Зимстанын олысьяскöд аддзысьлiгöн республикаса правительствоöн веськöдлысьöс вежысь Константин Лазаревлысь юалiсны, мыйла пö Габовын югыд бисö суткинас кöкъямыс час кежлö сöмын сетлöны? Некымын лун мысти нин лампочкаяс мöдiсны öзйыны быд лун дас кык час чöж. А öнi Зимстанса администрацияöн юрнуöдысь Владимир Лодыгин зiльö нин, медым бисö Габовын ньöти эз кусöдлыны.
Юан васö грездсаяс босьтöны юысь. Поссöветса депутат Зинаида Шучалина корö администрациялысь, медым писькöдасны юкмöс-скважина. Мöйму босьтчылiсны нин, но чорыд коризсö писькöдны эз вермыны. Вынйöраджык буритчан машина колö.
Вежоннас кыкысь Дзольын да Габовын олысьясöс новлöдлöны автобусöн Кулöмдiнöдз, кöсйöны лöсьöдны и сотöвöй телефона йитöд.
Би, сöстöм ва, телефон – ставыс тайö йöзлы. Позьö кутны лача, мый Воч юбокса сикт-грездын олöмыс оз кус.

Мöдам видзны и паметьнымöс. Та могысь и лöсьöдöма торъя фонд, кытчö сьöм вермасны вуджöдны найö, кодъяс кöсйöны отсавны ловзьöдны Габов грезд:

Получатель
Таскаев Сергей Викторович
Счет получателя
40817810628780977764
Банк получателя
КОМИ ОТДЕЛЕНИЕ №8617 ПАО СБЕРБАНК г.Сыктывкар
ИНН Банка получателя
7707083893
БИК Банка получателя
048702640
Корреспондентский счет
30101810400000000640
Код подразделения Банка по месту ведения счета карты (для внутренних переводов по системе Сбербанк)
55861704
Адрес подразделения Банка по месту ведения счета карты
г.Сыктывкар ул.Советская, дом 16
Назначение платежа
Создание народного музея «Дом солдата» в д.ГабовоУсть-Куломский район.

Лоасны кö юалöмъяс, позьö шыöдчыны Таскаев Сергей Викторович (телефоныс 8-912-105-35-00) да Лодыгин Василий Григорьевич (телефоныс 8-912-15-26-440) дорö.
Сергей Таскаев,
«Салдат керка» уджтас вöзйысь.