Дiасёрья посёлокысь Ульяна Сергеевна Карманова (öнi Яковенко) чужис Югыдтыдорын ыджыд семьяын. Батьсö, Сергей Григорьевич Кармановöс нуисны война вылö 1941-öд воö, а 1942-öд майын нин воис шог юöр — воши туй ни пом. Кыдз бöрынджык висьталiс тшöтш служитысь Бадьёльйывса ёртыс, взорвитчис минаöн. Мамыс Мария Ивановна ки вылö колины квайт челядь. Медiчöтыслы, Раисалы, сöмын на вöлi öти тöлысь. Та кындзи нöшта медыджыдыс Анастасия, сэсся Клавдия, звöннияс ачыс Ульяна да Алексей, Роза да Раиса. Ставныс эськö вöлiны дасöн, но нёльöн кувсисны.

• Тöд вылö усьлывлö, кыдз ми колльöдiм батьöс ыджыд война вылö Вöль ю кыр йылын. Батьöй пыжын нин пукалiс, кор горöдiс меным: «Волi Ниюк, ме тэнö ешшö дзигöдла!»
  Ме ваас келöмöн матыстчи пыж дорас, да батьö менö дзигöдлiс. Та бöрын сэсся сiйöс эг нин аддзыв, — юксьö У.С.Яковенко.
  Батьтöгыд быдмöмыд вöлi зэв сьöкыд да тшыг, кыдз и уналöн сiйö кадö.
  Ульяна Сергеевна велöдчис сизим класс, 14 арöссянь уджалiс «Гöрд звезда» колхозын.
• Тулыснас гöри да кöдзи, тöвнас новлöдлi Вöльдiнö шыдöс, а гожöмнас ставныс пуктiсны турун. Ме вöлi визув да тэрыб нывкаöн, та вöсна босьтлiсны быдпöлöс удж вылас, 1956-öд воын уджалi сучкорубöн, петкöдi вöв вылын вöр, — тадзи казьтылö томдырся кадсö олöма морт.
  Бöрынджык вуджис овны Диасёръя посёлокö. 1961-öд восянь уджалiс Пузласянь 12 километра сайын сулалысь Западнöй посёлокын.
  Сэнi уджалiс «Неваса экспедиция», корсисны боксит да алюминий кöрт шом куйланiнъяс. Уджалiс сэнi песласьысьöн, комендантöн да складöн веськöдлысьöн. Верöс сайö петöм бöрын ань комын во олiс Украинаын. Уджалiс теплицаын.
  Но, дерт жö, чужан сиктад да аслад гортад век кыскö сьöлöмыд. Верöсыслöн 2005-öд воын кувсьöм бöрын пыр и локтiс бöр Комиö.
  1991-öд восянь Ульяна Сергеевна уджöн шедöдöм шойччöг вылын. Олö Елизавета нылыскöд, сибыд да восьса сьöлöма морт. Пырöдчö культуралöн да йöзпöвстса уджъясö. 2020-öд воö гожöмнас война кадся сьыланкыв вылö «Газетса снимок вылын» видеоклипын снимайтчис öттшöтш клуб да библиотекаса уджалысьяскöд.
  Радейтö лыддьыны библиотекаысь босьтöм небöгъяс, юксьö Югыдтыдор грездын войнаöдз да войнабöрся олöм-вылöмöн.
  Елена Курочкина.
  Гижысьлöн чукöртöмысь снимокъяс вылын: Ульяна Сергеевна Яковенко; Ульяна Сергеевна вокыскöд да чойыскöд.