Озъягысь тайö томиник, мичаник, авъя нюма аньлöн олöмыс ичöтсяньыс йитчöма спорткöд. Дария Галиновская школаын велöдчигöн пыр ветлöдлiс баскетбол да туристалöм кузя секцияясö, кöнi туйдiс тренер, сiйö жö и физкультура нуöдысь, Евгений Александрович Нестеров. Ас тшöтшъяясыскöд пыр петкöдчисны да шедöдлiсны вермöмъяс посёлокса да районса ордйысьöмъясын. Дария пырис и районса öтувъя котырö да петкöдчисны республика тшупöдын нин. Туристалöм кузя мойвилiс веськавны весиг Рытыв-Войвыв кытшса ордйысьöмын. Пыр позис казявны сiйöс и «Зарница», «Орлёнок, «Йиркап» районса ворсöмъясын, кöнi колiс петкöдлыны тэрыблун, винёвлун, стöчлун да сям. Уна во помтöг асьсö песöмöн спорттöг эз нин вермы овны. Сы вöсна и шуис лоны физкультура велöдысьöн. Примерöн вöлi и туйдысьыс, Евгений Александрович, кодi кужис сибöдчыны челядь дорö, ышöдны найöс ёртасьны спорткöд. Дария кольöм воын помалiс Сыктывкарса госуниверситет. Босьтiс физкультура кындзи нöшта и ОБЖ велöдысьлысь специальносьтъяс. Бöр бергöдчис чужан посёлокас, аслас школаö.

— Индiсны старшöй вожатöйöн, — висьталiс Дария Сергеевна. — А спорт школасянь — тренер-велöдысьöн. Челядьöс туйда ворсны волейболысь. Волывлöны ичöт классъяссянь гырысьöдз зонкаяслöн да нывъяслöн котыръяс, ставыс 28 морт. Медводдза кадас ёна отсавлiс Евгений Александрович. Öнi, кор ковмас, и ачым нин сылы воча мунла, уджалам öта-мöдлы отсасьöмöн. Челядькöд вочасöн петавлiм нин районса ордйысьöмъяс вылö.

Том велöдысь водзмöстчö и общественнöй олöмын. Сiйö пырö посёлокса томъяслöн «Поколение-21» котырö. Таво петкöдчисны Ичöт Аныбын мунысь «Калейдоскоп» том йöзлöн чукöртчылöм вылын. Сэнi дорйисны «Бессмертный автополк» бала да вермисны. Веськöдöма сiйöс сы вылö, медым Победа лунö вöччöдöм машинаясöн Озъягсянь мунны Кужйöдз, кытшовтны сiйöс да бöр локны. Таво май öкмысöд лунö видлiгмоз петавлiсны нин, чукöрмылiс 15 машина.

Öнi регыд на Озъягса томулов, тшöтш и водзмöстчысь велöдчысьяс, ветлiсны Лузабердö регионъяскостса чукöртчылöм вылö, кодöс котыртiс «Медводзын мунысьяс» Россияса челядьлöн да томъяслöн öтмунöм. Быд пельöсысь локтöмъяслöн удж йывсьыныс висьталöмысь тöдмалiсны унатор. Петкöдчисны сiдзжö «Свеча памяти» акцияын, кытшовтiсны Абъячойса «Важ йöзлöн ордымтi», волiсны чужан му туялан музейö да с.в. Паныдалiсны выль ёртъясöс, кодъяскöд позяс водзö кутны йитöд удж кузяныс.

Таво Дария Сергеевнаöс школаын индiсны челядьöс быдтöм-велöдöм да общественнöй котыръяскöд йитöд кутöм кузя директорлöн сöветникöн. Уджыс кызвынсö коляс сiйö жö, кыдзи и старшöй вожатöялiгöн — зiльны челядькöд да томъяскöд, но тöжд-могыс кутшöмакö содас, да и кывкутöмыс сiдзжö.

— Водзö вылö могыс уна. Колö школасянь дасьтыны «Йöзкостса бюджет» бала, медым шедöдöм сьöм вылö котыртчöм театрлы босьтны атрибутика. Мöд бала колö лöсьöдны челядь водзмöстчöмъяслысь шöрин восьтöм могысь. Став тайö уджсö бергöдам челядьöс
туйдан-велöдан удж кузя завуч Юлия Андреевна Тарабукинакöд, — кывкöрталiс Д.С.Галиновская.
Галина Нестерова.
Снимок Дария Галиновскаялöн.