Зэв этша кад коли 9 да 11 классъясын велöдчысьяслöн ыджыд олöмö петтöдз. На пиысь кодкö стöча нiн тöдö, кутшöм туйöд восьлалас водзö, кодкö, гашкö, пыр на эз вермы бöрйыны сiйöс.

Районса бурдöдчанiнъясö удж вылö пыр колöны том специалистъяс. Талун вылыс тшупöда велöдчанiнъясын врачлысь тöдöмлун босьтöны 8 том морт да 1 велöдчö бурдöдысьясöс дасьтан колледжын «сестринское дело» специальность серти.

Шöр больничаысь кадръяс юкöнöн веськöдлысь Наталья Владимировна Рассыхаевалöн юöртöм серти бöръя кык воöн районö локтiсны 9 врач, 8 фельдшер да медсестра. На лыдын психиатр-нарколог, оториноларинголог, акушер-гинеколог, анестезиолог-реаниматолог, детскöй хирург, участкöвöй педиатр да терапевт. Руч да Кебанъёльса амбулаторияясö, Тимшер да Помöсдiн участкöвöй больничаясö воисны фельдшеръяс.

Векжö бурдöдысьяс оз тырмыны. Сöмын шöр больничаö колöны акушер-гинеколог, хирург, УЗИ да рентген вöчысьяс, функциональнöй диагностика кузя доктор. Кебанъёльö колö пинь бурдöдысь. Оз тырмыны участкöвöй терапевтъяс да педиатръяс. Участкöвöй больничаясö, ФАП-ясö да тэрыб отсöг сетан станцияö фельдшеръяс, фельдшер-лаборантъяс да акушеркаяс. Югыдъягса участкöвöй больничаö колö медсестра.

Школа помалысьяслы шöр больничаын бурдöдысьö велöдчыны окотитысьяслы сетöны целевöй направление. Шыöдчыны сыла колö шöр больничалöн кадръяс юкöнö май тöлысь чöж.

Шöр больничаö уджавны воысь медикъяслы сетöны государствосянь отсöг. Тайö 2 оклад мында öтчыд мынтан пособие. Россияысь любöйлаысь локтысьлы вештöны туйсö аслыс да семьяыслы. Выльлаын овмöдчöм могысь сетöны вештана 7 лун отпуск.

Бурдöдöдысьясöс уджалöм йылысь сёрнитчöм кырымалöм бöрын вöдитчöны кокньöдъясöн, лоö позянлун асланыс специальносьт серти кыпöдöны тöдöмлун, кык воöн öтчыд налы да семьяын уджавтöмаяслы вештöны шойччанiнö ветлан туй. Куим во чöж вештасны оланiн кöртымалöмысь врачлы 5000 шайт да шöр бурдöдан персоналлы 2500 шайтöн быд тöлысь. Сiдзжö вештасны и коммунальнöй могмöсысь.
Дасьтiс Ольга Васильева.