Комиысь уна сикт-грезд мунiсны-вошисны миян олöмысь, миян паметьысь. Мунiсны гусьöн, быттьö мыжмисны миян водзын. Тадзи бырис и Мöскашор – коркö нималысь вöр посёлок. Но сэнi вöвлöм олысьяс оз вунöдны ас чужанiн. Тадзи Зимстанса нывбабаяслöн котыр пуктiсны сэтчö гижöда ыджыд из.

Июль öкмысöд лунö Улыс Вочсянь видлыны шойччигмоз ми мöдöдчим Мöскашорлань. Местаöдз воöдчыны тракторöн да каракатöн отсалiсны Иван Егорович да Сергей Иванович Гичевъяс.
Гöгöр нин вöрсялöма. Пуяс öддзöмöн паськалöны, тыртöны-саймовтöны танi вöвлöмторсö. Шувгысь пуяс весиг быттьö нимкодясьöны воысьяслы. Тöвру, югыд шондi, сöстöм сынöд локтысьяслысь кыпöдöны лов.
Сергей Иванович триммерöн ытшкис кузь турун, Иван Егорович дасьтiс бипур öзтанiн, юква пуöм вылö чери кыйны мунiс Леонид Анатольевич Кузнецов. Аньяс лэччылiсны ю дорö вала. Сувтöдiм палаткаяс, дасьтiм сёян-юан. Кузь туй бöрад чöскыда и сёйсис!
Кöрт кок вылын сулалысь пас дорö, кытчö гижöма посёлок йылысь, пуктiм дзоридзьяс.

Нуръясьыштöм бöрын ветлiм ю дорö. Ляпкалöма, векнялöма тай. Юыс васö нуö, но сьöкыда лолалö нин везъялысь ва турунсьыс. Джуджыд местаясад пö чериыд эм на. Леонид Анатольевич юква вылö вайис чери. Зон чукöр сыысь эз колльчы. Ок и кажитчö кыйны черитö! Нывка да зонкаяс ваад шпольöдчисны и.

Вылыс Вочысь асланыс челядьнаныс воисны О.А. Лютоева, Т.И.Лютоева да Е.В.Лютоева. Шойччанiн тырис челядь гöлöсöн. Лоис нöшта на гажа.

Чöскыда нуръясим, бурпöт сьылiм да ворсiм, том и дзор шойччыштiсны палаткаясын.
Мында серам! Быдöнлы нимкодь! Нöшта эськö дзользьыштны! Эскам, водзö вылö позяс на аддзысьлыны.
Ветеранъяслöн котырö пырысьяс аттьöалiсны ставнысö бура шойччöмысь!
Валентина Ширяева.
Снимокъяс Улыс Вочса культура керкалöн.