Бурланьö вежсьöмъясöн

[ A+ ] /[ A- ]

Олöмысь ог кольччöй. И миян районлöн ылi пельöсö воисны öнiя кадся выль книгаяс, да найöс окотапырысь лыддьöны челядь, и миянлы кокниджык уджавны. Босьтны кö Соломония Васильевна Пылаевалысь мойдъяс, то найöс петкöдлöны торъя листъяс вылын. Позьö вöчны и выставка. Сэнi жö олöм йывсьыс, лэдзöм книгаяс йылысь юöръяс, серпасъяса мойдъяс. Наöн петавла садйö да школаö. Нывкаяс да зонкаяс зэв азыма лыддьöны найöс.

«Миян Тима Вень» петасын В.Т.Чисталёвлöн кывбуръясыс тшöтш торъя листъяс вылынöсь, аслыспöлöс мичлу-на серпасъясöн — Вылыс Эжваса вöр-валöн фотографияясöн.
Кольöм воын Вячеслав Бабинлöн петiс öтувъя кышöд улын кык книга – «Öшиньын бобув» да «Мытшöд». Кывбуръясыс рочöн и комиöн. И ставыс быттьö öшкамöшкалöн уна рöма, мича серпасъяса. Буретш татшöм книгаясыс воöны челядьлы сьöлöм выланыс, найöс лыддьöны окотапырысь.

Зэв аслыспöлöсöсь Елена Афанасьевалöн «Арся Дуда» да «Дуда чуксалö» книгаяс. Гижöма рочöн и комиöн, висьтъяссö тэчöма увлань да вывлань юрöн: комиыс öти ног, рочыс — мöд ног.
Ме уджала и вермытöм челядькöд, книгаяссö нула гортöдзныс. А налы кутшöм нимкодь кианыс босьтны аслыспöлöс петасъяс. Мед эськö татшöмсö лэдзисны унджыкöс.

Уджалöм бурмöдöм-сöвмöдöм могысь октябрын районысь куимöн ветлiм кыпöдны сям национальнöй библиотекаö. Кытшовтiм öнiя кадся 6 библиотека. Дерт, ылi грездса библиотекаясын на моз уджавны абу на позянлуныс, но унатор босьтi тöд вылö да пырта аслам уджö.
Людмила Ульдрикас.
Семён Морохинлöн снимок вылын Юлия Морохина, Арина Касева да Елизавета Есева.

Комментарии:

Добавить комментарий

Свежий выпуск: 8 декабря

Осторожно — мошенники!