Висьöмтö кокньыдджык öлöдны…

• Быд мортлöн бур дзоньвидзалуныс ас саяс. Колö кутчысьны дзоньвидза оласногö, шыбитны куритны, оз ков ышмыны коддзöданторъясöн. Нёрпалан кö, эн виччысь дзикöдз топöдöм, ас кадö шыöдчы бурдöдчанiнö. Висьöмтö, дыр бурдöдöм дорысь, кокньыдджык öлöдны, — панiс сёрни шöр бурдöдчанiнысь дзоньвидзалун жырйын уджалысь фельдшер Кристина Леонидовна Рассыхаева.
  Поликлиникаын уна во нин нуöдöны диспансеризация. Том специалист дорö локтöны веськыда, регистратураö кежавтöг, водзвыв гижöдчытöг, терапевт дорö пыравтöг. Кристина Леонидовна тшöктö сдайтны анализъяс. Налöн кывкöртöдъясын кö петкöдчö кутшöмкö висьöм, ыстас колана врач дорö.
  Ветлö уджалан котыръясö, школаö, йöзлы социальнöй отсöг сетан юкöнö да мукöдлаö. Лунвыв электрическöй сетьяслöн районса юкöнын сёрнитiс коронавирусысь вакцина вöчöмлöн коланлун йылысь. Абу гусятор, мый талунъя нывкаяс да зонкаяс вöдитчöны сiдз шусяна электроннöй чигаркаясöн, юöны «энергетикъяс», мый вайö ыджыд лёк томъяслöн вир-яйлы. Та йылысь и сёрнитö, öлöдö велöдчысьясöс. Öтка олöмаясöс дöзьöритысь социальнöй уджалысьясöс велöдiс вöдитчыны грелкаöн. Матыстчö гожöм, да кутас сёрнитны вöрса лудiкысь видзчысьöм йылысь, водзö вылö велöдас, кыдзи гортаныс куйлысь висьысьяслысь бурдöдны воссьöминъяс.
  Кольöм воын дзоньвидзалун лунö поликлиникаö локтысьяслысь мерайтiс давление, тушасö, сьöктасö, пульссö. Висьталiс сьöлöмсöн висьöмъяс йылысь, разöдiс дзоньвидза оласногö кутчысьöм йылысь гижöдъяс.
  ВКонтактеын эм «Кабинет медицинской профилактики с.Усть-Кулом» лист бок. Сэтчö йöзöдö вöчöм удж, дзоньвидза оласногö кутчысьöм, висьöмъясысь видзчысьöм йылысь юöръяс.
  Кристина Леонидовна фельдшерö велöдчис Сыктывкарса медколледжын, 2013-öд воын помалiс да уджалiс аптекаын. Петiс верöс сайö, чужтiс кага. 2017-öд воын корисны «Тэрыб отсöг сетан» юкöнö. Во уджалöм бöрын чужис мöд кага, да отпускысь петöм бöрын вуджöдiсны дзоньвидзалунлöн жырйö. Нöшта поликлиникаын вöчалö прививкаяс.
  Марина Дадашова.
  Гижысьлöн снимок вылын Кристина Леонидовна Рассыхаева.