Дорйöны оз öти мортöс

Водз асыв, а ыджыд машина дорын кузь öчеред нин. Тайö вир сетысьяс тэрмасьöны вир босьтан республикаса станцияысь воысьяс дорö. Тшöкыда вир сетысьяслы локтöм йылысь юöртöны водзвыв, а кодъяс кö да окотитöны сдайтны медводдзаысь на.
— Этша вылö туйö петö сизим морта котыр. Талун уджалöны куим регистратор, öти врач, öти лаборант, кык эксфузионист (туялöм могысь босьтö вир), кык медсестра. Медводдзаысь шыöдчысьлы бытьысь колö сьöрсьыс паспорт, СНИЛС. Сiйöс пасъясны, вочавидзас анкетаын юалöмъяс вылö. Колана кабалаяс гижалöм бöрын видлалö врач. Мерайтас давление да температура, видзöдлас кучиксö. Донъялас анкетаын вочакывъяс да тöдмалас-стöчмöдас, бöръясьыс кор да кутшöм висьöмöн нёрпавлiс. Вир босьтöм вылö кö лöсявтöм помкаыс абу, сдайтны позьö. Но быдöнлы колö кутчысьны диетаö. Медводз тöдмалöны вир группа да гемоглобин. Гемоглобин кö коланаысь этша, вир оз босьтны, — сёрнитiс врач-трансфузиолог Вадим Николаевич Кряжевской.
Районъясö волöны быд кык-куим тöлысь мысти. Миян районын нöшта ветлöны Помöсдiнö. Айловлы вонас вирсö позьö сдайтны витысь, аньяслы — нёльысь. Сэсся сöмын 60 лун мысти позьö сетны вир. Медым лоны пыдди пуктана донор-öн, колö сдайтны 40-ысь.
Вир босьтöны 18 арöссянь кöть кымынöдз, мед сöмын мортыс вöлi дзоньвидза. Машинаас эм став коланаыс. Вир нуöм могысь камера. Сыктывкар станцияын вир торйöдöны плазма, эритроцит, тромбоцит да мукöд компонентъяс вылö.
Вир сетысьяс пиысь унджыкыслöн вирыс лöсялана резуса (положительный резус). Медся этша донор нёльöд группаа лöсявтöмлуна резуса. Пикö воигöн лöсявтöм резуса медводдза группаа вир позьö сюйны быдöнлы, но сöмын литра джын.
Талун миян районын 100-ысь унджык донор. Медводдзаысь вир сетны окотитысьяслöн лыдыс вежласьö: тöвнас этшаджык, а гожöмын студентъяслöн гортаныс шойччыны воöмöн, машина локтан лунö шыöдчöны куим, а овлö и унджык морт. Доноръяслы колö дасьтысьны водзвыв. Вир сдайтан лун водзын рытнас да сдайтан лун асылö сёйны гостöг да ва вылын пуöм рок, чай юны кöлачöн либö сукарöн, бура узьны 8 час.
Некод ог тöдöй, мый талун-аски вермас лоны миянкöд либö матыссаяскöд, кыдз шуласны, абу стракуйтöма таысь, да кор ёна ковмас донорлöн вир. Йöзöс дорйысьяс оз тöдны, весиг оз аддзысьлыны висьысьяскöд либö доймалысьяскöд, кодъяслы сюйисны налысь вирсö. Доноръяслöн вир зэв колана неминучаясö веськалысьяслы, вирöн висьысьяслы, кага вайысьяслы да мукöдлы. 450 миллилитра вир вермас дорйыны оз öти, а куим мортöс. Станцияса уджалысьяс пöся аттьöалiсны Кулöмдiн районсаясöс йöзöс дорйöмö ыджыд пай пуктöмысь.
Марина Дадашова.
Гижысьлöн снимок вылын В.Н.Кряжевской бригадаыскöд.