Война, вир кисьтана война. Айловъяскöд орччöн Айму дорйыны öружиеöн кианыс сувтiс и уна сюрс нывбаба. Фронт вылö мунны индöма вöлi 500 сюрс гöгöр аньлы, на пиысь 200 сюрсыс комсомолеч. «Юбкаа боечьяс» вежисны айлов-санитаръясöс, телефонистъясöс, экспедиторъясöс, полевöй почта новлöдлысьясöс, снайперъясöс. Быдлаö лöсялiс аньяслöн киныс. Военнöй делöö велöдчöм нывъясöс индiсны снайперъяслöн, танкöвöй да артиллерийскöй полкъясö.

Воч сельсöветувса сиктъясысь нывъяс сiдзжö дорйисны чужан му. Агния Васильевна Морохина да Клавдия Васильевна Баранова (Кочанова) чужлiсны 1922–öд воын Вочын. Нывъяс велöдчисны карын медсестраяслöн курсъяс вылын, а сэсся доброволечöн мунiсны фронт вылö. Тайö вöлi 1942–öд вося ноябрын. Найö тышкасисны Белоруссияын да Украинаын. Зенитно-артиллерийскöй расчётса аньяс видзисны немечьяслöн самолётъясысь посъяс, кöрт туй, тöдчана объектъяс, ыджыд каръяс. Налысь повтöмлунсö пасйисны медальясöн, медводдза тшупöда «Отечественнöй война» орденöн. Бöрсö нывъяс гортаныс воисны 1945–öд воын.

Татьяна Степановна Гичева (Лужикова) чужлiс 1922–öд вося январын. Война кадö 19 арöса ныв недыр велöдчöм бöрын нывъёртъясыскöд мунiс Москваö. Аэростат часьтлöн могыс вöлi öти – видзны енэжсö юркар весьтысь. Налöн уна тöлысь кежлö колана оружиеöн вöлiны пöльтöм шаръяс, кодъясöс тыртöма топöдöм водородöн. Сынöдын öшалысь аэростатъяс торклiсны немецкöй бомбардировщикъяслысь могъяссö, и вöрöглöн бомбаясыс эз веськавны индöминö. Нывъяс повтöг дорйисны Москва. Ань гортас бергöдчис морöсас юбилейнöй да «За Победу над Германией» медальясöн да медводдза тшупöда «Отечественнöй война» орденöн. Война бöрас Татьяна Степановна верöсыскöд овмöдчис Вылыс Вочö, уджалiс сэтчöс сельпоын пекарöн да вузасьысьöн.
Валентина ШИРЯЕВА.
Гижысьлöн снимок вылын Т.С.Гичева.