Ия Васильевна Паршукова чужис 1939–öд вося март 11–öд лунö, сыысь öтдор вöлiс нöшта вок – Иван, кодi абу нин ловъя. Мамыс олiс 92 арöсöдз, а батьыс усис война вылын – Ладога ты дорын. Сэки Иялы вöлiс кык арöс, сы вöсна батьсö оз помнит.

Начальнöй классъясас велöдчисны Куръядорын, а гырысь классъясын – шöр школаын. Школасö кыпöдлiсны васöдiнö да резьöдлiсны, катöдлiсны вылöджык, кöнi и сулалiс 2013–öд воöдз. А сэккостi велöдчисны то öти, то мöд керкаын. Ия Васильевна казьтывлö, выльысьсö школасö лэптiгöн ёна пö отсасьлiм: кыскалiм лыа. Кодъяскöд уджавлiс, некод нин абу ловъя.

Челядьдырсянь и школа помалöм бöрын колхозын уджалiс разнорабочöйöн – сэк уджыд сиктад вöлi тырмö, кöть öнi нинöм абу. Гожöмнас пуктiсны турун, ытшкисны, куртiсны, чöвтiсны. Тöвнас ваялiсны. Сэсся артмöдiсны совхоз. Сэнi видзис куканьясöс. Тулыснас вуджöдлiсны мöдлапöлö, йирсянiнö. Арнас бöр: кодкö вуджлiс, а кодкö и вошлiс. Сэсся уджалiс лысьтысьысьöн. Кöджувдорын да Куръядорын – быдлаын вöлiсны скöтнöй дворъяс. Пенсия вылö петтöдз уджалiс школаын техничкаöн, во вит кымын.

21 арöсын петiс верöс сайö, чужтiс квайт челядьöс. Ставныс велöдчисны, разöдчисны. Верöсыс абу нин ловъя, кувсис 19 во сайын, вöлiс 67 арöс. Ыджыд семьяыд сиктад оз ов скöттöг – видзис мöс, порсь, ыжъясöс. Леонид пиыс армияас мунтöдз ньöблiс ытшкан. Сiйöс нуисны армияö, и агрегатыд жугалiс. Кöзяиныс мунiс, и техникаыд оз уджав. Мыйöн Мария нылыс петiс верöс сайö да мунiс овны Югыдъягö, вöлисти лэччысис скöт видзöмысь.

Öнi олö öтнасöн, ставсö на бура помнитö. Ачыс на консервируйтчис – вöчис лечо, солалiс öгурцы. Матын, орчча керкаын, олöны медся ыджыд пиыс да внукыс семьянас: и правнукъяс эмöсь, но оз тай ёна волывлыны. Но мыйöн вермöны – отсалöны: пескöн, ваöн, пывсьыны. Öти внук пырöдчис торъя военнöй операцияö, неважöн волiс отпускö. Тшöкыда пыралö Мария нылыс. Куш киöн, гöснечтöг некор оз лок. Ваньö зятыс ачыс консервируйтчö, кыйсьö – век пызан выв тыр ваясны.

Ия Васильевналöн зэв мича, ён гöлöсыс. Водзтi век ветлiс сьыланiнъясö, вичкоö, тöдö уна молитва. Но öнi вермытöг он мун, ылын да.
Лидия Прокопьевнакöд олöны орчча керкаясын, волысьöны öта-мöд дораныс, водзтi тшöтш ветлывлiсны лавкаöдз, вичкоöдз.
Людмила Игнатова.
Снимок олöмаяслöн котырлöн.