Агния Дмитриевна Кузнецова чужис Мысын 1938–öд вося декабр 15–öд лунö. Мамыс Марфа Егорьевна Попова, батьыс Дмитрий Алексеевич Попов. 1941–öд воын батьыс мунiс война вылö. Колис ловйöн, но семья дорас бöрсö эз лок. Лöсьöдлiс мöд семья. Мамыс уджавлiс «Павших борцов» колхозын. Нывка быдмыштöм бöрас отсасис мамыслы: чукöртiс шеп, брюква. Война бöрас мамсö пуксьöдлiсны кык во кежлö ки тыр сюысь. Нывка сэк олiс öтнас. Сёйнысö сетыштлiсны бур йöзыд: то ыджыд мамыс мыйкö чуктöдас, то чожыс. Гожöмнас пыжöн вуджöдлiс колхозникъясöс. Öтарас асьныс гырысь йöзыд сынлiсны, а мöдарöсö куш пыжсö вуджöдiс Агния. Вуджöдчöмсьыс сетлiсны нянь. Тулыснас Эжваысь куталiс пес, поткöдлыны эз вермы да чурканас и сюйлiс пачö. Сюйнытö эз вермы да медводз лэптылiс печуркаас, а сэсся пырлiс пачас да сiдзи и тэчлiс. Школаын велöдчис сöмын куим во. Велöдчынысö оз, вöлöм, вермы да дзолясяньыс и уджалiс колхозын.

1962–öд воын Агния петiс верöс сайö Юрий Андреевич Кузнецов сайö. Сiйö вöлi локтысь мортöн, уджавлiс электростанцияын электрикöн. Чужтiс кöкъямыс челядьöс: Михаил, Анна, Андрей, Матрёна, Нина, Анастасия (кувлiс ичöтсяньыс), Венера, Иван.

1957-1958–öд воясын уджалiс школаын пелькöдчысьöн. Зiлисны куимöн. Мыськасьöм кындзи колiс ломтыны 28 пач. Пессö пилитiсны да поткöдлiсны асьныс. Удждоныс вöлiс вит шайт, сэсся надзöникöн кыпöдiсны 15 шайтöдз. Пенсия вылас петöм водзвылын кыпöдiсны котельнöй, да лоис кокньыдджык.

Гозъя кыпöдiсны керка. Сэсся сэн нин лöсьöдiсны скöт да муяссö. Медводдза мöссö видзлiсны кык овмöсöн, а некымын во мысти лöсьöдiсны асьныс.
Таво Агния Дмитриевналы тырö 87 арöс. Челядьыс ловъянас колисны нёльöн. Олö меддзоля Иван пиыскöд.
Надежда Шахова.
Снимок олöмаяслöн котырлöн.Оценили 0 человек