2025–öд во – Комиын геройяслöн во. Водзтi Мыс сиктын вöлісны и ветеранъяс, и тылын уджалысьяс. Талун кежлö колисны сöмын война кадся челядьдыра олысьяс. Вот бур йöзыс и сетiсны сэтшöм мöвп: ветеранъяслöн котырлы гижыштны на йылысь. Сэтшöмыс вит морт, кодъяслöн олöмыс эз вöв кокни, и налы эм мый казьтыштны, и найöс позьö öткодявны геройяскöд.

На пиысь öти Елена Григорьевна Трубачёва, нывдырсянас Упкова, чужис Усинск районса Сынянырд сиктын 1937–öд вося декабр 25 лунö. Война пансьöм йылысь помнитö сöмын, мый ёна бöрдiс батьыслöн война вылö мунöм бöрын. Сэсся батьсö эз и аддзывлы – пöгибнитiс. Война бöрас нин, кор фронт вылысь локталiсны салдатъяс, мамыс мöдысь петiс верöс сайö, Гаврил Гаврилович Филиппов сайö. Öтлаасьöм бöрас семьянас вуджисны овны Усвавомö. Сэнi чужис нöшта кык чой: Галя да Валя. Мамыс уджалiс лысьтысьысьöн, а дядьыс колхозлöн правлениеöн веськöдлысьöн. Усвавомын помалiс 10 класс, сэсся пырис Сыктывкарса медучилищеö. Помалöм бöрас, 1962–öд воын, ыстiсны уджавны Мысö. Татчö локтöм бöрын олiс Ульяния Егоровна Паршукова öтка нывбаба дорын. Сэсся тöдмасис Леонид Александрович Трубачёвкöд да 1963–öд вося январын петiс верöс сайö. Öтамöд бöрся чужис нёль челядь: Света, Таня, Вася да Миша. Челядьыс кызвынсö олiсны инькаыскöд. Инькаыс вöлiс зэв шань мортöн, некор эз дойдлы лёк кывйöн, век дорйылiс. Верöсыс ты висьöмысь кувсис водз.

Мысыд воис сьöлöм вылас, сöмын пö вывтi нин кузь сиктыс, сизим километра. Корлiсны кö Куръядорö, колiс кöмавны кузь гöленя сапöг – туйыс вöлi зэв няйт да. Мунан да мунан да, коркö эськö и воан висьысь дорад, а колö на и бöр мунны. Пыр мöвпалiс, кыдз пö бара воа: биясыд уличаад абуöсь, туйыд няйт, öти киад сумка, мöдарас пöнар. Тадз вöлi и шлапсьöдö, öдва волiс гортас. И гортад удж виччысьö: идравны мöс, челядькöд олыштны, дасьтыны сёянюан – коркö тай водлiс жö-а. Йöзыд сэк вöлiс зэв уна – 1200 морт, куш кагаыс – 42. Ёна полiс нöбасьысь аньясысь. Кор уджалiс Анна Антоновнакöд – сiйö вöлiс акушеркаöн да, кокниджык вöлiс. Сэсся сiйö мунiс пенсия вылö, и колис öтнасöн, вот сэк сэсся и босьтлö вöлi полöмыд. Анна Антоновна вöлi бур ёрт и шань нывбаба, быдторйö туйдiс-велöдiс том мортöс. А лекарствоыдла ветлiсны пöпуткаöн Тимшерö, овлiс, мый туйö петалiсны подöн. Кыскан лекарство тыра ноптö, а пöсьыд шливгö-киссьö. Тулыс-арын сюрлiс вуджны и йи вывтi. Воськов вöчан – йиыд трачкакылö, быттьö стеклö. Полöмöйла пö вöлi весиг пöсявла. А тöвнас ветлывлiсны Усть-Нем базаö вöлöн.
Школаад челядьыд вöлiс уна, быд классын 36 морт да унджык. Лунтыр тырмывлiс уколавны найöс. Кор воис пенсия арлыд, 50 арöсын, пыр и петiс шойччыны.
Пенсия вылö петöм бöрын Елена Григорьевна олiс скöтöн, кор вермис на. Öнi олö Вася пиыскöд.
Антонида Портнягина.
Снимок олöмаяслöн котырлöн.