Интернетын Казаньса культура, спорт да видз-му овмöс юкöнъяслöн лист бокъясысь позьö аддзыны и Кулöмдiнысь Софья Уляшевалысь снимокъяс. Нывка велöдчö Казаньса торговоэкономическöй техникумын фототехникö. Студентъясöс корлöны быдсикас гажъяс, ордйысьöмъяс да ярмаркаяс вылö, бöрйöны, босьтöны медся буръяссö да йöзöдöны асланыс сайтъясын.

Нывка аслас телефонöн снимайтiс школасянь. Александр Серафимович батьыс казялiс нылыслысь лов кыпöданторсö да квайтöд классас козьналiс бур фотоаппарат. Тайö ышöдiс водзö корсьны, аддзыны аслыспöлöсинъяс, мичаинъяс. Снимайтiс öти классын велöдчысьясöс, школаын олöм-велöдчöм, вöр-ва, чужанiн. Пыр ас кöдыс босьтлiс фотоаппарат, ассьыс уджъяссö чукöртлiс торъя папкаö, флешкаö. И мöвпалiс, мый лоас фотографöн. Öкмысöд классын велöдчигöн интернетысь корсьысис, кöнi позьö велöдчыны тайö специальносьтас. Кировын да Казаньын, и бöрйис Казань. Бать-мамыс эз сувтны паныд, мый нылыс мунö ылi карö. Öтлаын и ветлiсны, техникумö нуисны Софьяöн дасьтöм снимокъяс. Öттшöтш тöдмасисны карыскöд, шойччыштiсны.

Батьыс бара вöчис козин – уна позянлуна бур телефон. Медводдза воын сетiсны 10-11 классъяслы колана тöдöмлун, мöд восянь бöрйöм специальносьт серти нин.
– Казань ыджыд да мича кар. Эм кытчö петны, эм мый босьтны студентъяслы. Миян велöдысьяс сёрнитчöны, да ми ветлам быдсикас гажъяс, ордйысьöмъяс вылö, нуöданторъяссö котыртысьяс и асьныс корöны миянöс. И колö аддзыны, кыйны сiдз шусяна кадрсö. Видз-му овмöс юкöнлöн вöлiс ярманга, снимайтiм, кыдзи пукталiсны, вöзйöны вöлöганысö, кыдзи сёрнитöны ньöбасьысьясыскöд. Кросс, кöнкö да тшöтш котöртiм, мыйсö сöмын эг вöчöй, мед кыйни здукъяссö. Бöрти миян велöдысьяс бöрйöны да налы ыстöны снимокъяснымöс, медбуръяссö и босьтöны, – сёрнитiс Софья Уляшева.

Студентъяс öта-мöдныслысь снимокъяс донъялöны ыджыд экран вылысь, мый бура нин артмö, мый вылын колö на уджавны. Техникумын овлöны выставкаяс. Волöны видзöдны-донъявны снимокъяссö Татарстан пасьталаысь фотографъяс.

Школаын на велöдчигöн котралiс районса культура керкаö Оксана Владимировна Кондрашкиналöн «Ренессанс» котырö. И сэнi Софья прöст кадö ветлö «Чикибро» йöктан студияö, петкöдчöны культура шöринъясын да керкаясын.
Бöрйöм специальносьт серти колö велöдчыны куим во. Тайö туйвизьын мöвпалö велöдчыны и водзö.
Марина Дадашова.
Снимокъяс Софья Уляшевалöн.