Великöй Отечественнöй войналöн йöлöгаыс öнöдз на кылö миян олöмын. Дзоляник Бадьёльйыв грездысь война вылын усис сёысь уна морт, унджыкыслöн овыс Уляшев. Менам рöдын сідзжö вöліны найö, кодъяс тышкасисны вöрöгкöд. Тайö менам пöрысь ыджыд бать да дядь.

Пöрысь ыджыд батьöс шулісны Егор Фёдорович Уляшевöн, грездса ногöн кö, Педöр Ёгорöн. Чужліс сійö 1913–öд воын да овліс миян Кулöмдін районса Бадьёльйыв грездын. Бура, вöлöм, гудöкасьö, зэв сюсьöн вöлöма.
Фронт вылö сійöс нуöмаöсь 1941–öд вося август 24–öд лунö. Гортас кольöмаöсь муса Анна гöтырыс да дзоля Эля нылыс. Гижліс уна письмö, рочöн и комиöн. Öнöдз на найöс мамöй видзö.

Со письмöысь юкöн, кодöс гижлöма ыджыд батьöй 1942–öд вося сентябр 10–öд лунö:
«Видза оланныд, дона Нюра гöтыр да Эля нылук! Кыдзи оланныд, мый тіян выльторйыс? Тані войяс пондісны кöдздöдны. Став узьлан кöлуйысь öти шинель: и улад вольсав, и шебрась, и юр улад пукты, позьö гöгöрвоны. Пока олам шалашын, а шалашсö роскöн плетитöма, ёна оз шонты. Нюра, кор пöлучитан, сразу гиж öтвет. Пока ловъя, колö сёрнитны, немтор он тöд, талун ловъя, аски верман пöгибнитны. Гиж, кыдзи быдмö Эля, кутшöма муніс хлебоуборка, сеноуборка, кыдзи олöны пöрысьяс, ставсö гиж, кута виччысьны лунысьлун. Коля жив-здоров, и тіянлы желайта став бурсö. Дзигöдла, окала. Тэнад верöс Уляшев».Кулöма 1943–öд вося январ 3–öд лунö. Дзебöмаöсь Новгород обласьтса Парфино районса Кузьминское сиктын.Пöрысь ыджыд мамлы, Ёгор Анналы, вöлі зэв сьöкыд верöстöг быдтысьны. Ковмис мöдысь петны верöс сайö. Василий Фёдорович Булышев отсаліс быдтыны менсьым ыджыд мамöс. Вась дядь чужлöма 1905–öд вося февраль 29–öд лунö сідзжö миян районса Смолянка посёлокын. Фронт вылад вöлöма жö. Кор Новгород обласьтса Старöй Русса дорын ёна ранитчöма, бöр лэдзöмаöсь гортас.

50–öд воясын сійö локтöма миян грездö уджавны лесничöйöн. Менам пöрысь ыджыд мамкöд кыпöдлöмаöсь ас керка. Вась дядь вöлöма быдтор кужысьöн: и пу дадьтö вöчлöма, и чер путö, и карнантö. Зэв уна вöлі сылöн орден да медаль. Быд во Победа праздник лунö вöлöм пасьтавлö пинджак, кöні вöлöм югъялöны сылöн наградаясыс.
Кувсьöма 1994–öд вося октябр 9–öд лунö, тшук абу олöма 90 арöсöдз.

Миян öнія мог – некор оз ков вунöдны найöс, кодъяс матыстісны ыджыд Вермöм. Öд эз кö найö дорйыны миянлысь мунымöс, эз эськö вöв мирнöй олöм. Аттьö тіянлы, Геройяс!
Марат Карманов,
Помöсдiнса школа,
5 «Б» класс.