— Овны ас киöн лэптöм керкаын, тайö менам ичöтсянь кöсйöм, — панiс сёрнисö Виктор Евгеньевич Быков, кодöс позьö тшöкыда аддзыны кыпыд выль керка дорын вöчасигöн рытъяснас да шойччан лунъясö.

 Кулöмдiнысь Екатерина Васильевна гöтырыскöд тöдмасисны интернет пыр. Öкмыс во сайын мужичöй локтiс Кулöмдiнö кöдзыд Воркутаысь. Гижсисны. Овмöдчисны гöтырыслöн пу керкаö. Екатериналöн быдмис нин пи да ныв. Кад кольöм мысти чужис нöшта пи. Куим челядя семьялы лоис дзескыд. Сэк и чужис гозъялы важöнсянь нин олöмö вöзйысьысь мöвп — кыпöдны ыджыд да шоныд оланiн.

 Виктор Евгеньевич быдмис батьтöм-мамтöм челядьлы керкаын да ыджыд уджö мыйсянь босьтчыны эз тöд. Керка лэптöмыд абу öтка удж. Отсöг вылö воисны Екатериналöн батьыс Василий Михайлович да вокыс Михаил Васильевич Кочановъяс. Став куимнан восö Быковъяслöн семьялы ёна отсасисны рöдвужыс эз сöмын сöветöн, но и уджöн. Виктор Евгеньевичлöн висьталöм серти гöтырыслöн батьыс киподтуя да тöлка морт эз нин öти керка лэпты. Дерт, кывкутана уджö босьтчытöдз интернетысь гозъя лыддисны унатор, юасисны и тöдсаяслысь. Викторлы мойвиис и уджöн. Мужичöй зiльö «СТРОЙМАТ» магазинын вузасьысьöн. Волöны керка лэптыгöн да пытшкöс уджъяс вöчигöн уна ньöбасьысь, юасьöны да водзöс юксьöны асланыс мöвпъясöн. Öнiя кадö, майбыр, эм ставыс. Позьö кыпöдны керка керйысь, брусысь, кирпичысь да мукöдторйысь. Быковъяс босьтчисны вöчны юр сюянiнсö сiдз шусяна газоблокъясысь. Душ-мöд воöн лэптiсны кык судтаа керка вевт улö нин. Таво босьтчисны вöчны ломтысянiн. Локны кутас и ва.

— Майбыр, ыджыд керкаад тöрам ставöн и челядь, и внукъяс, — кывкöрталiс кöзяин.
Татьяна Чувьюрова.
 Снимок гижысьлöн.