Нёль во коставлöм бöрын велöдан управление бара котыртiс да нуöдiс «Лымпиада» тöвся ворсöмъяс. 11 садйысь пырöдчис 12 котыр, ставнас 72 нывка да зонка.

Ворсöмъяс мунiсны витлаын, март 15-öд лунö Югыдъягса медводдза номера да Немдiнса, март 16-öдö — Зимстанса садъясын, март 17-öдö — Помöсдiнын да март 18-öдö Кулöмдiнын лыжиöн котраланiнъясын.
Быд котырлы колiс коми кыв вылын лöсьöдны ним да девиз. Вын да эбöс петкöдлiсны «Гын сапöг шыблалöм» (водсанога веркöсö гынсапöг лыйöм), «Тар кыйöдöм» (кыссьöм), «Йöра бöрся вöтчöм» (лыжиöн котöртöм), «Руч кок туйöд мунöм» (мачьяс косттi клюшкаöн шайба нуöдöм), «Даддьöн исласьöм» юкöнъясын. Челядьлöн котыръяс петкöдлiсны бур öтувъялун.

Медся стöча лыйсисны Носимысь «Лымчиръяс», Кулöмдiнса «Нюм» садйысь «Тэрыбöсь, ёнöсь, збойöсь», Немдiнысь «Тэрыб йöраяс» котыръяс. Шайба медся сюся тюрöдiс, исласис даддьöн да кыскасис «Вильышпоз» котыр, лыжиöн котöртöмын ставнысö бöрö колис Помöсдiнса нёльöд номера садйысь «Шондi» котыр.
Ставсö артыштöмöн тöвся ворсöмъясын вермис Кулöмдiнса медводдза номера садйысь «Вильышпоз», мöдöн лоис Помöсдiнысь «Шондi» да коймöдöн Кебанъёльса «Мойд» садйысь «Повтöм челядь» котыръяс. Вермысьясöс пасйисны грамотаясöн да козинъясöн.

Спорт дорö муслунсö чужтöны садсянь нин. Быд лун песöны ки-кок, ворсöны. Тадзи быдтöны аскиа чемпионъясöс.
Наталия Нестерова, велöдан управлениеса уджалысь.
Снимокъяс Виктор Остряковлöн.