Оз уна морт тöдны да кужны ворсны шылада инструментöн. Кодлыкö колö вель дыр велöдчыны, медым гöгöрвоны нотаяс да пуктыны найöс ворсантор вылö, кодлыкö Енмыс сетö татшöм шудлунсö, а кодлыкö и «ош пель вылас сувтлывлö». Но эмöсь сэтшöм йöз, кодъяслы бать-мамсянь, пöль-пöчсянь да нöшта на важджык рöдвужсянь вуджö да кольö нэм кежлö сьылан-ворсан шыясыс.
Скöрöдумысь Алексей Иванович Шомысов велöдiс Помöсдiнын математика. Заводитчис Первой мирöвöй война, и А.И.Шомысовöс босьтiсны армияö. 1917-öд воын воис бöр Помöсдiнö да заводитiс веськöдлыны партийнöй ячейкаöн, отсасисны гöль йöзлы. Партийнöй удж кузя ыстiсны Санкт-Петербургö. Сэтысь и аддзис ассьыс шудсö Екатерина Семёновна Фёдороваöс, гижысь Геннадий Фёдоровлысь воча чойсö. Карса нывлы висьталiс, мый ылi коми грездын сылöн куим судта патера. Татшöм дивöтö и локтiс видзöдлыны том ныв. Пырис, а сэнi гöбöч, öти жыр да пöлать, вот и став, коми ногöн кö, куим судта. Екатерина Семёновна и кольччис «куим судта» патераад. Гижсисны, чужисны нёль ныв Мария, Анюта, Вера да Саньö.

А.И.Шомысовлöн сьöлöмыс пыр висис коми крестьяна вöсна. Дзоляник грездын гажöдчылiсны эськö быд рыт, но колö вöлi мыйкö шензьöданатор. Гозъя ветлiсны выльысь Питерö да вайисны сэтысь фисгармония. Мый сiйö сэтшöмыс — öнi на унаöн оз тöдны.

Фисгармония тайö пианино кодь шылада ворсантор. Сöмын шыыс петö гудöкысь моз – мехъяс отсöгöн. Кок улас кык педаль, колö ворсiгöн личкавны найöс, медым сынöдыс пырис фисгармония пытшкö да петiгас сетiс ворсысьлы колана шы. А шыыс, быттьö ыджыд вичкоын, пытшкöдзыд йиджö да шымыртö вир-яйтö. Тайöс дивöсö и вайисны гозъя Скöрöдумöдз. Пуктiсны кумö.
Быд рыт Шомысовъяслöн керкаö чукöрмылiс уна йöз. Алексей Иванович ворслiс фисгармонияöн, а гöтырыс сизим струнаа гитараöн. Сьылiсны, йöктiсны, гажöдiсны йöзлысь сьöкыд сьöд олöм…
Водзö лыддьöй май 20-öд лунся газетысь.
Татьяна Чувьюрова.