[ A+ ] /[ A- ]

ТУЯЛÍСНЫ НЕМЕЧЬЯСЛЫСЬ ОЛÖМ

Июль 10 лунсянь июль 22 лунöдз миян районын уджалìс Коми республикаын немеч культурнöй автономиялöн экспедиция, кодì туялìс кольöм нэмса комынöд воясын Эжва йылö вайöм мыждöм улö веськалöм йöзлысь да налöн ныв-пилысь танì олöм-вылöм. Вöлìны Кулöмдìнын, Помöсдìнын, Тимшерын, Лопъювадын, Югыдъягын, Зимстанын, кöнì вайöм йöзлы урчитìсны овны да уджавны. Пöшти быдлаын дзик на нинöм эз вöв, сулалìс парма.

Котыр, кöнì вöлìны кызь кыкöн, овмöдчылìс Кулöмдìнын «Пожöма яг» турбазаö. Тасянь и ветлöдлìсны районса сиктъясö да посёлокъясö районöн могмöдöм машинаöн.

Кыдз-мый мунìс удж, висьталìс экспедицияöн научнöй веськöдлысь, республикаын «Покаяние» фондöн юрнуöдысь Михаил Борисович Рогачёв:

— Культурнöй автономия котыртöм бöрын республикаын олысь немечьяс зìльджыка босьтчисны туявны татчö вайлöм ас йöзлысь олöмсö. Тìян районö экспедиция кöкъямысöд нин. Водзынджык вöлìны Кöрткерöс, Ухта, Сосногорск, Чилимдìн, Койгорт, Печора, Сыктыв, Сыктывдìн районъясын. Медводдза куим экспедицияöн веськöдлìс Коми научнöй шöринса уджалысь Вера Николаевна Потолицына, а сэсся пыр на ме. Корсьысьысь котырын кызвыннас республикаса вузъясысь студентъяс, медсясö немечьяс, мый и гöгöрвоана. Быд во вежласьöны, но овлöны кыкысь да весиг куимысь ветлысьяс. Таво эмöсь кыкöн тìян районысь — Югыдъягысь Ксения Лямбрехт да Маргарита Генке. Тавося экспедиция торъялö сìйöн, мый кыкöн эмöсь Коми-Пермяк автономнöй кытшысь. Немечьясöс йöршитлìсны и налöн пармаö. Быд экспедицияын шöркодя 18-22 морт. Найö и чукöртöны материал семьяясö волöмöн да юасьöмöн, важ посёлокъясö пыралöмöн, шойнаяс вылö кежалöмöн да с.в. Кыдзи уджавны, велöдам экспедицияö мунтöдз, тöдмöдам районöн, кытчö мунам, тöдчöдам, мыйын сылöс аслыспöлöслуныс. Водзвыв дасьтысьöмöн, кыдз правилö, удж мунö бура.

Тöдчöда, мый миянöс бура вочаалöны быдлаын. Медводз пасъя, мый бура вочаалìс миянöс да быдторйöн отсалìс районса юралысь Дмитрий Александрович Шатохин. Зэв бура котыртìсны миянлысь олöм «Пожöма яг» турбазаын, век могмöдìсны транспортöн. Миян корöмъяс дорö кывкутöмöн матыстчисны и сиктъясöн да посёлокъясöн юрнуöдысьяс. Пример вылö, миян вöсна зэв бур тöждлун вöлì Зим-станын. Танì воис сьöлöм вылö сìйö, мый сувтöдöмаöсь Зимстанö медводдза воысьяслы (а наöн вöлìны немечьяс) пас. Посёлокыс сöстöм, йöзыс вежавидзысьöсь. Миянлы зэв унатор висьталìс да петкöдлìс социальнöй педагог Эрика Людвиговна Шульц.

Сьöлöмö колянаöсь вöлìны семьяяскöд, торъя йöзкöд аддзысьлöмъяс. Босьтны кöть Тимшерысь 93 арöса Арнольд Кирсткöд аддзысьлöм. Ыджыд арлыда нин, но сы мындасö он сет: мортыс вöраснас збодер, ловнас кыпыд. Век на олö скöтöн. Сьöкыд удж бергöдöм могысь ньöбис кольöм воын трактор, руль сайын ачыс.

Немечьяс кыдзи зìльöсь, сìдзи и ассьыныс рöднысö-вужнысö, оланногнысö, культуранысö сьöлöманыс видзысьöсь. Кутшöмкö ногöн сяммылöмаöсь вайны Комиöдз немеч кыв вылын сэкся книгаяс, документъяс да мукöдтор. Вöр дорын мучитчигöн кулöм йöзлöн матысса да рöдвуж унатор вöчöны, медым тайö йöз йывсьыс тöдìсны: сувтöдалöны вöвлöм посёлокъясö да шойнаяс вылö пасъяс да крестъяс, гижöны газетъясын, лэдзöны книгаяс, дасьтöны кинофильмъяс. Тайö экспедициялöн материалъяс серти петас книга и Кулöмдìн районса немечьяс йылысь. Сìдзжö тайö материалъясыс шогмасны гижöдъяс вылö, кодъяс пырасны репрессируйтöм немечьяс йылысь öтувъя томö.

М.Б.Рогачёв сìдзжö висьталìс, мый налы ёнакодь отсасисны чужан му туялысьяс. Бур кывйöн казьтыштìс Джеджимысь Зоя Степановна Напалковаöс, кодì юрнуöдö деревняса музейöн. Буретш сэтчö пыралìсны экспедицияö пырысьяс. Михаил Борисовичлöн кывъяс серти, татшöм музейыс абу уна ыджыд сиктлöн, непöштö ичöтик деревнялöн.

Туясьöмысь кындзи, тöдмасисны и районöн, медсясö тöдчана местаясöн, ветлìсны Дереваннöйö, Ульянаö, Кадамö, Войвыв Екатерининскöй канал вылö.

— Тìян район эз сöмын меным, но и экспедицияса став йöзлы сьöлöм вылö воис зэв ёна, — кывкöртìс М.Б.Рогачёв. — Кыдзи аслас вöр-валöн мичлунöн, сìдзи и йöзлöн шаньлунöн. Тайö кутас овны миян паметьын.

Михаил Борисовичлöн кывкöртöд дорö содта, мый миян районын олысь йöз шаньöсь абу сöмын немечьяс, а став национальносьта йöз дорö, кодъяс унапöлöс помкаяс вöсна Эжва йылынöсь. Сìдз шусяна национальнöй проблема миян эз вöв некор. Коми морт сэтшöм, мый сетö локтысьлы и дöрöмсö, и нянь шöрöмсö. Кыдз правилö, бур вöчöмсö локтысьяс помнитöны да вочавидзöны тадзи жö. Дерт, овлöны «гораммöдчылöмъяс», но тайö абу «стенмö кайöм», а лöсьöдчыны позянатор.

Июнь 21 лунö «Пожöма яг» турбазаын вöчисны экспедициялöн уджлы кывкöртöд. Сы вылö волìс весиг районса юралысь Д.А.Шатохин. Медводз сёрнитìс М.Б.Рогачёв, кызвыннас висьталìс сìйöс, мый йылысь ме гижи нин. Мöдöн босьтлìс кыв республикаын немечьяслöн культурнöй автономияöн веськöдлысьöс вежысь журналист-ветеран Р.И.Бихерт. Сìйö висьталìс государствоöс, республикаöс да районöс кольöм кадын сöвмöдöмö немечьяслöн пай йылысь, ошкис том йöзöс зìль уджысь, висьталìс районса администрациялы отсалöмысь аттьö да корис отсыштны сьöмöн, медым лэдзны районса немечьяс йылысь книга, козьналìс Д.А.Шатохинлы водзынджык лэдзöмöс, кодì шусьö «Боль длиною в жизнь».

Районса юралысь Д.А.Ша-тохин шуис, мый район уна национальносьта. Öтиясöс ыстìсны мырдöн, мöдъяс локтìсны асьныс. Олöны öта-мöдкöд лöсялöмöн, пуктöны ассьыныс пай районлысь экономика да социальнöй юкöн сöвмöдöмö. Ыджыда зìльöм тöдчö и немечьяслöн.

— Менам мам висьтавлìс, мый овлìсны вайöм немечьяскöд орччöн да налы быдторйöн отсавлìсны. Найö кутìсны асьнысö шаня, вöлìны зìльöсь, — висьталìс районса юралысь. — Татшöмöсь и талунъя немечьяс. Зэв бур, мый томъяс туялöны кольöм олöмсö, сы вöсна мый важсö тöдтöг выльсö лöсьöдны он вермы. Книга лэдзöм могысь сьöмöн, кыв шутöг, отсыштам. Немечьяс, кыдзи и мукöдъяс — миян йöз, районлöн историяыс öти.

Уна бур кыв висьталìс отсöг вичмöдöмысь районса администрациялы, торйöн кö, сэнì уджалысь Ю.С.Поповалы, местаяс вылын администрацияясöн веськöдлысьяслы, став отсалысьлы, экспедициялысь удж котыртысь Ольга Владимировна Моисеева. Сы дорö сюртчисны экспедицияö пырысьяс. Найö шуисны, мый аслыныс вöлì интереснö тöдмасьны районкöд, сыкöд кутасны йитöд водзö.

— Волöй водзö, Эжва йыв вочаалас тìянöс век пöсь сьöлöмöн, — кывкöртìс Д.А.Шатохин, и тайö бур кывъяссö волысьяс, дерт жö, видзасны сьöлöмъясаныс.

Тайö аддзысьлöм бöрын ме нöшта сёрнитì М.Б.Рогачёвкöд. Воддза висьталöм дорас сìйö содтìс, мый Коми республикаö вайöм немечьяс пиысь медся унаöс пыртìсны Лузаберд, Сыктыв, Кöрткерöс да Кулöмдìн районъясö, кöнì вöлìны эз сöмын спецпосёлокъяс, но и лагеръяс. Танì жö медся уна немеч олö и талун. Та вöсна медся уна материал вермас сюрны татысь. Корсьысян удж мунас водзö. Сìйö, кыдзи научнöй веськöдлысь, сìдзжö водзö отсалас корсьысьысьяслы. Сэтчö жö, экспедицияын и «Покаяние» фондын уджалöм топыда йитчöмаöсь öта-мöдныскöд.

Казьтылöм нин Маргарита Генке, кодì «Парма гор» газетын неважöн йöзöдìс Югыдъягса велöдчысьяслöн вöвлöм Немскöй посёлокö, кöнì овлìсны немечьяс, а сìдзжö Белоборскö, кöнì олöны найö и талун, ветлöм йылысь гижöд, кöсйысис гижны экспедицияын уджалöм йылысь. Кутам виччысьны.

Ассянь содта со мый. Тесьтöй менам, кодì вöлì Великöй Отечественнöй война вылын да тöдлìс, кодъяс сэтшöм немечьясыс, кор босьтчылìсны сёрнитны радио пыр немеч кыв вылын, пыр жö тупкылìс. Ме сìйöс гöгöрвоа, но найöс, кодъясöс мöдöдìсны гортсьыныс, веськыда кö шуны, пукавны сöмын сы вöсна, мый найö — немечьяс, мыжавны нинöмысь. Миян кодь жö йöз, зìльöсь да и, пöжалуй, культураныс — олöмын кутчысьöмыс — вылынджык. Велöдлì школаын и институтын немецкöй да мыйсюрö весиг помнита. Немечьяс пöвстысь тöдлì вель уна бур йöзöс и талун эмöсь бур тöдсаяс. Абу сöмын районын, но и республикаын бура тöдсаöсь немеч вужъя сэтшöм йöз, кыдз Помöсдìнысь шöр школаса директор Фрида Эмануиловна Линдт, öнì пенсионер, зэв бура сьылысь Магдалина Эриховна Морохина, лесопунктса начальник (öнì абу нин ловъя) Леонид Теодорович Карманов да унаöн мукöдъяс.

Шуны кö сöветскöй кадын моз, ме — интернационалист, народъяслöн ёртасьöм вöсна да донъяла йöзöс сы серти, кыдзи найö олöны да уджалöны. Тöдöмысь, тадзи жö и став бур йöз.

Василий ЛОДЫГИН.

 

 

 

 

Комментарии:

Комментарии запрещены.

Свежий выпуск: 20 июня

Осторожно — мошенники!