Сöстöмлун — ас сайын

Лым сылöм бöрын бара гöгöр петкöдчис лöп-ёг, кодъясöс асьным шыблалiм тöвбыдöн. Местаяс вылын сиктса юралысьяс чукöртлiсны предприятиеясöн, организацияясöн да учреждениеясöн веськöдлысьясöс, индiсны, кодлы да кытi пелькöдны, кутшöм техникаöн новлыны лöп-ёг. Районса администрация апрель 28 лун йöзöдлiс район пасьта пелькöдчан лунöн.

— Пелькöдчыны петöм йылысь юöръяс öшлiм сикт пасьта, — висьталiс Кулöмдiнса администрацияöн веськöдлысьлысь могъяс олöмö пöртысь С.В.Рубан. — Предприятиеясöн, организацияясöн да учреждениеясöн веськöдлысьяс, юöртлiм нин да, тöдiсны та йылысь. Субöтникöдз кытшовтiм нöшта уна патераа öтувъя керкаяс. Ас керкаын олысьяс йöрнысö сöстöммöдöны тшöктытöг. Мед сöмын лöп-ёг эз шыблавны йöр саяныс, туйяс либö контейнеръяс бокö. Асьныс кö оз вермыны нуны, медым сöвтöны мешöкъясö да чукöртöны найöс контейнеръяс либö туй бокö, шыöдчöны администрацияö либö «Север» котырö. Кольöм арын öткымынъяс контейнеръяс дорö ваялöмаöсь вöлi картупель коръяс да град вылысь мукöд шыбласъяс, артмöмаöсь ыджыд чукöръяс. Найöс идравны лоö медавны сöвтчан техника. Та вылö мунö содтöд сьöм, кодöс эськö позис видзны челядьлы ворсанiн лöсьöдöм либö туй дзоньталöм вылö. Кодлöн абу мешöкныс, мед волöны администрацияö, сетам дон босьттöг. Кытчö веськалö шыблалöм дорысь мед чукöртöны лöп-ёгсö мешöкъясö да сувтöдöны найöс уличьяс либö контейнеръяс бокö во гöгöр чöж. Бур пример позьö босьтны Стрöительяслöн да Сöветскöй уличаяс вылын олысьяслысь. Сэтчö ветлö нуны лöп-ёг быд шойччан лунö «Север» котырлöн техника.

Юрсиктöд кытшовтiгöн казялi, мый горт гöгöр пелькöдчисны унаöн. Воддза воясын кö уналаын, торйöн нин туйяс да контейнеръяс бокын, вöлiны лöп-ёг чукöръяс, öнi татшöмыс эз тыдав. Таво «Север» котыр ставсö идралö ас кадö. Котырöн веськöдлысь А.И.Шахов кужöмöн котыртö удж, тöждысьö сиктлöн сöстöмлун вöсна. Сиктса администрация сетiс новлыны лöп-ёг торъя машина. Сöстöммöдчö вит уджтöмалысь. Водзö вылö петас 13 морт. Нöшта кыкöс индiсны пыр уджалöм вылö. Вочасöн кутасны пелькöдны и посни уличьяс. Шöр туйяс бокысь лöп-ёг идралас туй дзоньталан Кулöмдiнса участок.

— Юрсиктсаяслöн олан культураыс абу на колан тшупöдын, — шуис С.В. Рубан. — Районса вель уна сиктын олöны сöстöмджыка, сы вöсна мый радейтöны ассьыныс чужанiнсö, пыдди пуктöны öта-мöдлысь уджсö.

Пелькöдчан кызвын удж эштiс нин, но та вылын оз сувтны, Кулöмдiнöс мичмöдны да сöстöммöдны кутасны водзö.