Олöмлöн выль тшупöдö

Иван Степанович да Светлана Владимировна Лопыревъяслöн тайö воыс зэв тöдчана. Нёльнан пиныс вуджöны олöмыслöн выль тшупöдö. Öти лунö чужысь Антон, Александр да Роман пырöны медводдза классö, Владислав петö асмывкыдöн олöмö, 11 класс помалöм бöрын сентябр öтиöд лунсянь кутас велöдчыны Сыктывкарса университет бердын экономика, право да информатика колледжын. Ставныс нин дасьöсь велöдчан во кежлö.
А лöсьöдчисны гожöм чöж. Медводз куим дзоляыслы быдöнлы торйöн ньöбисны пызан-улöс, шкап да тумбочка. Кольöм восянь быдöнлöн эм компьютер. Августын лэччылiсны карö босьтны кöм-пась.
— Куимнаныслы колö öткодь, да паськöмтö бöрйыны сьöкыдджык. Дзолядырйисö эз на гöгöрвоны да, ньöбöм дöрöм-гачыс торъялiсны рöмнас. Муртса быдмыштiсны да öта-мöд вылас видзöдöмöн кутiсны шуны: «Меным Ромалöн либö Антонлöн кодь жö колö». Быдöнлöн аслас öбича. Куим пиысь медводзöн чужысь да вокъясöн юрнуöдысь Александр зiльджык, медводзöн уськöдчö уджад, а со Романöс колö ышöдны. Антон ладмöдчысь, кывзысьысь, пельк. Медводдза лунсянь велалiсны садса олöмö, водзмöстчисны, петкöдчисны быд гажын. Дерт, уджалысьяс сорсьылiсны, а сэсся тöдiсны нин кодi Саша, кодi Рома да кодi Антон. Öтлаын ворсасны, пинясьласны, тышкö воласны и. Шкодитасны кö, зэв сьöкыд корсьны мыжасö. Öтик кö абу гортын, сы вылö и индасны. Но пырас да, оз нин тöдны нинöм, абу аддзылöмаöсь ни, асьным кö казялам, сэки висьтасясны, — сёрнитiс уна челядя мам, лавкаын вузасьысь Светлана Владимировна.
Дерт, пиян вöсна унджык тöждыс усьö мам да öтлаын олысь Галина Ивановна ыджыд мамыс вылö. Светлана Владимировна велöдчис водительö, да Иван Степанович верöсыс кö удж вылын, ачыс и нуö-вайö коланаинö. Семья кутысь батьныс ГИБДД-лöн районса юкöнын туйвыв патруль юкöнын командир, полицияса старшöй лейтенант. Кык судта ас керкаад уджыд пыр эм. Батьыс вылö видзöдöмöн да отсасьöмöн унатор нин кужö Владислав, талун верманасö вöчöны ичöт пияныс. Майбыр, ыджыд öшинюв, да батьныслöн тшöкыда «öзйы-лö» челядь руыс, ворсöны кутасьöмысь, футболысь да мукöдторйысь. Унанад да, эм кодысь да кытчö дзебсьыны, кодöс суöдны.
Гожöмын ывлаын котралöм да шойччöм кындзи серпасасины, велöдчисны лыддьысьны. Тадзи лöсьöдчисны школа кежлö. Бать-мам пыр велöдiсны, мый став уджсö колö вайöдны помöдз, школаын сюся кывзыны велöдысьöс, овны шаня, астшöтшъяяскöд ёртасьöмöн да öта-мöдлы отсасьöмöн.
Öлöдö и Владислав. Сöмын бура велöдчöмöн да школа помалöмöн пö позяс пырны техникумö либö институт-университетö, аддзыны сьöлöм серти удж. Антон пыр и юалiс, а кутшöм нö пö медся бур да колана уджыс, мöвпалö нин аскиа лун йылысь.
— Нимкодь, мый Владиславлöн медводдза да зэв бур велöдысь Эльвира Владимировна Фаст дорö веськалöны и Александр, Антон да Роман. И колö жö лоны, кыдзи и сэки, классас пö унджыкыс зонка. Ыджыд сяма велöдысь кужас öтувтны и челядьöс, и бать-мамöс, — кыпыд русö эз дзеб Светлана Владимировна.
Марина Дадашова.
Снимок Светлана Лопыревалöн.