Кебанъёльын

* Кебанъёльын 709 овмöс, лыддьыссьö 2107 олысь, но олö сöмын 1705 морт. На лыдын 1002 нывбаба да 703 айлов.

* 410 пенсионер, на пиысь уджалö 59.

* 80 арöсысь ыджыдджыкöсь 32-öн. Медся ыджыд арлыдаöсь Анастасия Степановна Селиванова да Дарья Кузьминична Гуляева. Кык-нанныслы 91.

* 7 салдат дöва, тылса 22 уджалысь, уна челядя 12 семья.

* Служитöны армияын 14-öн, локтìсны армияысь 16-öн. «Пöсь точкаясын» вöлìны 27-öн, Чернобыльса лоöмтор бырöдны ветлìсны 7-öн.

* Вöлì 5 кöлысь.

* 2011 воын чужис 30, таво — 15 кага. 2011 воын кулìс 24, таво — 10 морт.

* Посёлокö овны локтìсны 10-öн, мунìсны 4-öн.

* Посёлоксаяс асэмбуралìсны 456 оланìн, администрация улын 160. Ас керка кыпöдöны 12-öн.

* Кебанъёльсаяс эновтчöны скöт видзöмысь. Колис сöмын 15 мöс, 19 кукань да öшпи, 50 ыж да кöза, öти вöв.

* Посёлокын эмöсь АТС, школа, клуб, лесничество, сад, тыр арлыдтöмъяслы социальнöй приют, амбулатория, почта юкöн, ас вылö уджалысь Н.И.Зубколöн кондитерскöй цех, 8 лавка, 5 пилорама.

* Кебанъёль дорын Лунвыв электрическöй сетьяслöн районса база, ломтас-мавтасöн могмöданìн, пуръясянìн да пöрöдöм вöр видзанìн.

* Посёлокса олысьясöс шоныдöн да ваöн могмöдö «Коми теплöвöй компания» котырлöн Кулöмдìнса юкöн.

* 15-öд профессиональнöй училищелöн юкöн дасьтö специалистъясöс оз сöмын районлы, но и республикалы. Татысь петöны вöрса техника вылын уджалысьяс, пач тэчысьяс, шöрасьысьяс, вурсьысьяс да с.в.

* Кебанъёльсаяс ёртасьöны спорткöд туристъяслöн базаын, «Дружба» спортзалын. Эм футболöн ворсанìн.

* Регыд прöст кад позяс коллявны да шойччыны О.Ю.Тагаевалöн кафеын.

* Водительяслы дасьтö козин Юнус Баширов. Сìйö кутас дзоньтавны машинаяслысь гöгыльяс.

* Школаын велöдчö 183 морт. Налы тöдöмлунъяс сетö 27 велöдысь.

* Садйö ветлö 140 челядь, кодъясöс дöзьöритö 32 морт.

* Кебанъёльын пасйöма 53 уджтöмалысьöс, но збыльвылас унджык. Ыджыд лача кутöны «ЦентроВудКом» вылö, но завод вöчöм нюжалö.

* Администрациялöн зìльöмöн школа дорö вöчисны ворсанìн, Шöр улича бокö подöн ветланìн, дзоньталìсны челядьлы ворсанìн, сувтöдìсны ёг чукöртанìнъяс, тыртìсны туйяс вылысь гуранъяс, пуктìсны кылöдчысьяслöн оланìнö биысь дорйöм могысь кык ва видзанìн.

* Йöзöс гажöдö 2008 вося декабрын котыртчöм «Прекрасное настроение» хор. Петкöдчö быд праздник дырйи, ветлö концертъясöн орчча посёлокъясö да сиктъясö.

* Бура уджалö ветеранъяслöн котыр, кодöн веськöдлö Тамара Александровна Тарабукина. Аддзысьлöны орчча сиктъясса ветеранъяскöд, котыртлöны ордйысьöмъяс, шойччан рытъяс. Ветлöны гортöдз да нимöдöны найöс, кодъяс 80 арöсысь ыджыдджыкöсь.

* Кебанъёльын олö киподтуя уна морт. Виктор Николаевич Борзов вöчасьö пуысь, снимайтчö. Сылöн снимокъяс овлöны фотовыставкаяс вылын, босьтлöны приза местаяс конкурсъясын.

* Уджвывса ветеран Александр Александрович Гусев гижö кывбуръяс. Найöс йöзöдлö районса газет.

* Посёлокын вöлì профилакторий, кöнì бурмöдлìсны дзоньвидзалунсö районса олöма йöз, но сìйöс тупкисны — лоис ыджыд воштöм.

Николай ЛЮТОЕВ.