Февраль 25-öд лунö республикаса юралысьлöн администрацияын донъялiсны «Йöзкостса бюджет» бала серти таво збыльмöдан йöзöн вöзйöмторъяс. Миян районысь бöрйисны 15 бала, найöс пöртасны олöмö «Югыдъяг», «Пожöг», «Руч», «Дiасёръя», «Дереваннöй», «Парч», «Дон», «Куж», «Зимстан», «Помöсдiн», «Кулöмдiн» овмöдчöминъясын. Уджъяс вылö урчитiсны 10,2 миллион шайт. Смолянкаын вöчасны челядьлы ворсанiн, Дiасёръяын да Пожöгдiнын бурмöдасны шойна да гöгöрсö, Дереваннöйын — парк, Аныбын, Парчын да Лебежнöйын вежасны Великöй Отечественнöй война вылын усьöмаяслы казьтылан пас да лöсьöдасны гöгöрыс, Озъягын нюжöдасны ва визь, Шöръягса да Кулöмдiнса школаясын дзоньталасны вевт да джодж, джодж вежасны Кужса культура керкаын, Зимстанса клубын вöчасны асмогасянiн, «Помöсдiн» кооператив босьтас оборудование, Кулöмдiнын асшöр уджалысь ньöбас кулöмаясöс новлöдлыны машина, юрсикт-ын жö вольсаласны моски, Вомынбöжын бурмöдасны туй юкöн, кодъясны пöлöнсö. 

Донса социокультурнöй шöринын кружокъяс нуöдысь да гажъяс котыртысь Ольга Николаевна Тимушевалöн да Тамара Петровна Напалковалöн мича сьылöмöн пансис «Ноко, мамъяс!» кыпыд конкурс. Республикаса юралысьлöн общественнöй примитанiнысь районса службаöн веськöдлысь Антонина Анатольевна Кузнецова да Донса юралысь Александр Степанович Нехорошев чолöмалiсны мамъясöс, чойясöс, радейтанаясöс мича тувсовъя праздникöн да сиисны дзоньвидзалун, шуд да мед збыльмис став кöсйöмыс. Гаж вылын Анна Степановна Липиналы, вöвлöм велöдысьлы да тылса уджалысьлы, сетiсны Победа лунсянь 75-öд вося тшупöда паслы сиöм медаль. Анна Степановна аттьöалiс козьналöм дзоридзьясысь да медальысь.

Эг и тöдлöй воис тулыс, кöть эськö сiйö, быттьö аркöд венласьöмöн, ыджыдалiс важöнсянь. Полiгтырйи виччысям гожöм, татшöм тöлöн кутшöмöн сiйö лоас. Öд кольöм воын бура тешитiс, ни тшак ни вотöс ни турун пуктöм. Дерт, медся сьöкыд вöлi видз-му овмöс юкöнлы. Кыдзи зэра да кöдзыд гожöм тöдчис налы, кыдзи тöвйисны, кыдзи лöсьöдчöны гöра-кöдза кежлö? Тайö да мукöдтор йылысь висьталiс видз-му овмöс юкöнöн веськöдлысь Анастасия Ревокатовна Ярова.

«Улыс Воч» овмöдчöминысь юралысь Николай Фёдорович Морохинöс республика сöвмöдöмö тöдчана пай пуктöмысь «За заслуги перед Республикой Коми» пас сетöмöн.
Николай Фёдорович заводитлöма уджалан туйсö «Вычегодскöй» госпромхозын, öтувъя уджалан стажыс чукöрмöма нин 30 во, сэтысь 12-сö — веськöдлö овмöдчöминöн. Сиам и водзö вылö выль ыджыд вермöмъяс