Воссис «Гранд» вузасян шöрин
Воторникö Кулöмдiнын артмис зэв ыджыдтор — воссис «Гранд» вузасян шöрин, кодi зымвидзö сикт шöрын, мичлуннас сiдзи и кыскö ас дорас. Асывсянь юргис музыка, быттьö корис ньöбасьысьясöс.Чукöрмисны унаöн, волiсны район пасьтаысь. Быдöн кöсйис тöдны, мыйöн кутасны вузасьны.
Восьтiгöн сёрнитiс районса юралысь Д.А.Шатохин.
-Июль озыр бур лоöмторъясöн, — висьталiс сiйö. — Пасйим районлысь 85 вося тшупöд, Кулöмдiнын воссис ёнмöдчан шöрин. И со öнi — «Гранд» вузасян шöрин. Тайö ыджыд лоöмтор. Сiйö, позьö шуны, экономикалöн зэв тöдчана да кывкутана бала, кодi олöмö пöртсис матö нёль во. Чайта, шöринлöн лавкаяс кутасны бура могмöдны районса олысьясöс.
Ас вылö уджалысьяс, вузасянiнъясса кöзяинъяс В.Н. да А.А.Сметанинъяслы да А.А.Агиевлы экономика сöвмöдöмö ыджыд пайысь вичмöдiс почёт грамотаяс.
А.И.Агиев, кодi пуктiс подув «Агиевский» магазин восьтöмлы да сöвмöдöмлы, пöся аттьöалiс районса олысьясöс, кодъяс воча мунiсны öнiя кадлы лöсялан лавка кыпöдöмлы да баласö донъялiгöн сы вöсна сетiсны ассьыныс гöлöсъяс, а сiдзжö лавкаын дыр уджалысьясöс, ныла-пиасö да зятьсö, А.А. да В.Н.Сметанинъясöс да А.А.Агиевöс, кодъяс водзö нуöдöны сылысь удж, да шöрин кыпöдысьясöс, кодъяс ставсö вöчисны ыджыд кывкутöмöн.
Бурсиан кывъяс висьталiсны и «Домстрой» котырысь А.Б.Чисталёв да В.Н.Сметанин. Василий Николаевич пасйис, мый öнi восьтöны сöмын шöринлысь юкöн: «Всё в дом» вузасянiн, кöнi гортса унасикас эмбур да техника, «Мобилайн», кöнi сотöвöй телефонъяс, часiяс, «Солнечный бегемотик» — кöнi челядьлы кöм-пась, чачаяс, мукöд колантор. Регыд воссяс «Спорт Макс» лавка, кöнi лоасны спорт радейтысьяслы коланторъяс. Сiйö и гöгöрвоана: районын бöръя кадö йöз ёна сетчисны спортö. Тайö вузасянiныс медводдза кык судтаын. Коймöд судтаысь жыръяс сетасны кöртымö лавкаяс да офисъяс улö.
Гöрд лента вундiсны Д.А.Шатохин, А.И.Агиев да А.Б.Чисталёв. Ньöбасьысьяс шензисны: ставыс лыдтöм, эм мый бöрйыны да донъявны. Медводдзаяслы вичмисны козинъяс. Видзöдöмысь, некод эз пет куш киöн, быдöн мыйкö да ньöбис. Йöз ошкисны вузасянiнъяссö, кöнi жыръяс ыджыдöсь, ставыс син улын, позьö матыстчывны, видлавны, бöрйыны. Кыдзи шуис В.Н.Сметанин, ставсö вöчöма ньöбасьысьлы бур вылö.
Галина НЕСТЕРОВА.
Снимокъяс авторлöн.
Комментарии: