Челядьöс садйын быдтысь-велöдысьяс пуктöны школаын велöдöмлы подув. Уджö пыртöны выльторъяс, асьныс дасьтöны балаяс да программаяс, велöдöны ворсöмöн да с.в. «2014 вося воспитатель» конкурсын петкöдлiсны уджалан сям Кулöмдiнса садъясысь Е.А.Пименова, Е.В.Золотарёва, Н.С. Игнатова, Кебанъёльысь В.А.Кузнецова, Зимстанысь Н.М.Хаянен да Помöсдiнысь С.Н.Игнатова.
Медся бур воспитательöн лоис öкмысöд номера Кулöмдiнса садйысь старшöй воспитатель Нина Сергеевна Уляшева (снимок вылын), кодi апрель 21 лунö петкöдчас республикаса конкурсын. Мöдöн лоис Помöсдiнысь С.Н.Игнатова да коймöдöн — Кебанъёльысь В.А.Кузнецова. Найöс чолöмалiс, бурсиис да сетiс дипломъяс районса юралысь Д.А.Шатохин. Мукöд петкöдчысьясöс пасйисны аттьöалан гижöдъясöн. Видзöдысьяс медвылö донъялiсны Е.А.Пименовалысь петкöдчöмсö.
Воспитательлöн ыджыд тöдчанлун йылысь сёрнитiс да чолöмалiс велöдан управлениеса начальник О.А.Холопов. Аттьöалiсны медводдза номера садса уджалысьясöс, кодъяс кыпыда дасьтöмаöсь челядьöс видзанiнсö петкöдчиг кежлö.
Гижöд да снимок
Марина ДАДАШОВАЛÖН.